Rossiyada so‘nggi sutkada COVID-19 bemorlarining 317 nafari vafot etdi, deb xabar bermoqda Meduza koronavirusga qarshi kurashish tezkor shtabiga tayanib. Bu Rossiyada pandemiya boshlanganidan buyon bir kecha-kunduzdagi o‘limlar soni bo‘yicha yangi antirekord.
Foto: Reuters
“RBK”ning yozishicha, avvalgi antirekord 15-oktabr kuni qayd etilgan, shu kuni COVID-19 286 kishining umriga zomin bo‘lgandi. Mamlakatda umumiy hisobda koronavirusdan vafot etganlar soni 24 952 nafarga yetgan.
Bir kun avval Rossiyada COVID-19 bemorlarining 269 nafari vafot etgani ma’lum qilingandi. Mamlakatda 13-oktabrdan boshlab sutka davomida virus qurbonlari soni 200 kishidan ortiq bo‘lmoqda.
So‘nggi sutkada Rossiyada koronavirusga chalinish bo‘yicha 15 700 ta yangi holat qayd etilgan. Bemorlar sonining sutkalik o‘sishi bundan bir kun oldingi ko‘rsatkichdan qariyb 600 nafarga kam. Shu kuni 16 mingdan ortiq kishida COVID-19 aniqlanib, mamlakatda kasallanganlar soni bo‘yicha antirekord o‘rnatilgandi. Rossiyada pandemiya boshlanganidan buyon jami 1 447 335 kishida koronavirus aniqlangan.
O‘tgan bir kecha-kunduz davomida sog‘ayganlar soni 10 952 nafarni tashkil etgan. Jami hisobda mamlakatda 1 096 560 kishi koronavirusdan sog‘aygan.
“Rospotrebnadzor” ma’lumotlariga ko‘ra, Rossiyada koronavirusni aniqlash bo‘yicha so‘nggi 24 soat davomida 496 mingta, umumiy hisobda esa 55,1 milliondan ortiq test o‘tkazilgan.
