Россияда сўнгги суткада 16 550 кишида коронавирус аниқланди, деб хабар бермоқда Meduza, коронавирусга қарши курашиш тезкор штабнинг 27 октябрдаги маълумотига таяниб. Бу бир кун аввал қайд этилган ҳолатлардан 797 тага кам бўлиб, шу куни рекорд даражада — 17 347 кишида COVID-19 аниқланганди.
Янги аниқланган касалланиш ҳолатларининг энг кўпи Москва ( +4312 киши), Санкт-Петербург (+721) ва Москва вилоятида (+496) қайд этилган.
Мамлакатда касалланганларнинг умумий сони 1 547 774 нафарга етди.
Сутка давомида COVID-19 беморларининг 320 нафари, пандемия бошланганидан буён эса 26 589 нафари вафот этган. Бундан аввал коронавирусдан ўлим ҳолатлари сонининг юқори бўлиши 21 октябрь куни кузатилган, шу куни сутка давомида 317 киши вафот этганди.
Соғайганлар сони эса 1 158 940 нафарни ташкил этмоқда, шу жумладан, беморларнинг 12 844 нафари сўнгги бир кеча-кундузда тузалиб, касалхонадан жавоб берилган.
«Роспотребнадзор» маълумотларига кўра, Россияда коронавирусни аниқлаш бўйича сўнгги 24 соат давомида 402 мингта, умумий ҳисобда эса 58,2 миллиондан ортиқ тест ўтказилган.
Россияда жами касалланганлар сони 1,5 миллиондан ошганига қарамай, ҳукумат мамлакатда коронавирус тарқалиши туфайли қатъий чекловларни жорий қилишни режалаштирмаяпти. «Роспотребнадзор» раҳбари Анна Попова Россияда касалланишнинг ортишини йилнинг совуқ мавсуми бошлангани билан боғлаган. Шунингдек, бунга таъсир қилувчи омиллар қаторига фуқароларнинг таътилдан ва ишга қайтганлигини киритган.
«Роспотребнадзор» Эпидемиология марказий илмий-тадқиқот институти директорининг тадқиқот ишлари бўйича ўринбосари Александр Горелов Россияда март ойигача коронавирус билан касалланишлар сони камайишини тахмин қилган. Гамалея номидаги Миллий эпидемиология ва микробиология илмий-тадқиқот маркази яширин инфекциялар микробиологияси бўлимининг собиқ раҳбари, профессор, вирусолог Виктор Зуев эса мамлакатда эпидемиологик вазият 2021 йил ёзида барқарорлашади, деган фикрда.
Изоҳ (0)