Guliston tumanida O‘zbekistonda yagona bo‘lgan Qorako‘ldagi xalqaro matematika maktabi bilan hamkorlikda tashkil etilgan Sirdaryo–Qorako‘l maktab-internatining 26-oktabr kuni ochilish marosimi bo‘lib o‘tdi. Bu haqda Sirdaryo viloyati hokimligi matbuot kotibi Zafar Mirrahimov “Daryo”ga xabar bermoqda.
“Qorako‘l xalqaro matematika maktabini Sirdaryo viloyatida ham tashkil etish maqsadida viloyat hokimi G‘ofurjon Mirzayev topshirig‘i bilan bir qator mas’ullar 2019-yil Qorako‘l maktabiga tashrif buyurib, muzokaralar olib borgan edi. Viloyat rahbarining tashabbusi bugun o‘z samarasini berdi.
Maktab internatida o‘quvchilarga 3 yo‘nalishda ta’lim beriladi. 2020-yilda maktabga 500 nafar o‘quvchi hujjat topshirgan bo‘lsa, ulardan 240 nafari shaffof tarzda o‘tkazilgan sinov asosida o‘qishga qabul qilindi. Muassasada matematika, fizika, kimyo, biologiya va ingliz tili fanlari chuqurlashtirib o‘rgatiladi. O‘quv jarayoni Qorako‘l xalqaro matematika maktabi bilan hamkorlikda ishlab chiqilgan o‘quv rejalar va dasturlar bo‘yicha amalga oshiriladi. 12 nafar buxorolik mutaxassislar o‘quvchilarga dars beradi. Har bir o‘quvchining o‘zlashtirish ko‘rsatkichi monitoring qilinib, individual ishlanadi”, deyiladi hokimlik axborotida.
Qayd etilishicha, maktab-internatining qurilishi uchun mahalliy budjetdan 10 milliard so‘m mablag‘ ajratildi. Zamonaviy loyiha asosida 240 o‘ringa mo‘ljallangan ikki qavatli o‘quv binosi va yotoqxona, sport zali, oshxona bunyod etildi. Barcha zarur jihozlar mahalliy tadbirkorlar tomonidan ishlab chiqarilgan.
Izoh (0)