Toshkent va Andijonda qariyb 10 mlrd so‘mlik noqonuniy tranzit operatsiyasiga chek qo‘yildi

Davlat bojxona qo‘mitasining Kontrabandaga qarshi kurashish va bojxona auditi boshqarmasi Andijon va Toshkent viloyatlari bojxona boshqarmalari bilan hamkorlikda oldindan olingan ma’lumotlar asosida o‘tkazilgan tezkor tadbir natijasida tovar-moddiy boyliklarni bojxona nazoratidan yashirin ravishda olib kirish maqsadida amalga oshirilgan tranzit operatsiyasini fosh qildi. Bu haqda O‘zA xabar qilmoqda.

Xususan, Andijon viloyati bojxona boshqarmasining “Do‘stlik” chegara bojxona posti orqali qo‘shni davlatga chiqib ketish uchun tun yarmida kelgan 2 ta yuk avtotransport vositasi belgilangan tartibda inspeksion ko‘rik majmuasi orqali ko‘zdan kechirildi.

Yuk avtotransport vositalarida olib chiqilayotgan tovarlar bilan haydovchilarning bojxonaga taqdim qilingan hujjatlarida ko‘rsatilgan tovarlar o‘rtasida keskin tafovutlar aniqlangan. Hujjatlarga ko‘ra, mashinalarning birida 11 turdagi, ikkinchisida esa 14 turdagi tovar bo‘lishi lozim edi.

Ammo, bojxona ko‘rigi davomida avtotransportlarga bojxona qiymati nisbatan past bo‘lgan po‘kak, yelim, quruvchilar uchun maxsus kiyim va qo‘lqoplar, rezina etik va bolg‘alar ortilgani aniqlangan. Shunchaki bo‘sh tarzda chiqib ketmasligi uchun ushbu tovarlar bilan nomigagina to‘ldirilgan.

Mazkur avtotransport vositalari 2020-yilning 16-oktabr kuni Qoraqalpog‘istondagi “Dout ota” chegara-bojxona posti orqali respublikaga kirib kelgan.

Kirib kelishda bojxona organlariga taqdim qilingan hujjatlar bilan inspeksion ko‘rik majmuasi orqali olingan tasvirlarda bojxona xodimlarini shubhalantirgan jihatlar ko‘zga tashlanmagan. Natijada yuk avtotransport vositalari tranzit tarzida chiqib ketishi uchun Andijon viloyatidagi “Do‘stlik” chegara bojxona postiga yo‘naltirilgan.

Hujjatlarda ko‘rsatilgan tovarlar aslida ushbu avtotransport vositalarida haqiqatan ham bo‘lgan. Ammo respublikaga kirib kelishda va chiqib ketishda inspeksion ko‘rik majmuasi orqali olingan tasvirlar bir-biridan farqlidir.

Aniqlanishicha, yuk avtotransport vositalariga ortilgan tovarlar Toshkent viloyati Zangiota tumanida joylashgan omborlardan biriga tushirilgan.

Mazkur omborni belgilangan tartibda ko‘zdan kechirish davomida shu yerda bo‘lib turgan chet ellik fuqaro ushbu yuklar o‘ziga tegishli ekanligini ma’lum qildi. Ammo ularning bojxona rasmiylashtiruvini tasdiqlovchi bironta ham hujjatlarni taqdim qila olmadi.

Aniqlanishicha, mazkur yuk avtotransport vositalari tirkamalarining eshiklari ochilmagan va mavjud plombalar buzilmagan. Shunga qaramay, ularning ichidagi yuklarni almashtirish uchun tirkamalar boshqa tomonidan turib, o‘zboshimchalik bilan ochilgan.

Shu tariqa bojxona xodimlari respublika hududidan tranzit tarzida olib o‘tilishi lozim bo‘lgan 24 turdagi 9113 dona tovar ichki hududda tushirib qoldirilganini aniqladi. Mazkur tovarlarning umumiy qiymati esa 6 milliard 502 million so‘mni tashkil qilmoqda. Tezkor tadbir davomida huquqbuzarlardan jami qiymati 9 milliard 850 million so‘mdan ortiq qiymatdagi tovarlar va transport vositalari vaqtincha saqlovga olindi.

Holat yuzasidan bojxona organlari tomonidan tergovga qadar tekshiruv harakatlari davom ettirilmoqda.

Avvalroq Sirdaryoda 113 million so‘mlik tibbiy buyumlar va virus blokatorlarining noqonuniy aylanmasiga chek qo‘yilgani xabar qilingandi.