O‘zbekiston Prezidenti Shavkat Mirziyoyev 26-oktabr kuni qurilish sohasidagi loyihalar taqdimoti bilan tanishdi. Bu haqda Prezident matbuot xizmati xabar berdi.
Ma’lum qilinishicha, 2020-yilda qishloqlarda 12 mingdan ziyod, shaharlarda 18 mingdan ortiq ko‘p qavatli turar joy barpo etilmoqda. Sardoba suv omboridagi hodisadan keyin Sardoba hamda Mirzaobod tumanlarida qisqa muddatda 86 ta besh qavatli uy qurib bitkazildi.
Ta’kidlanishicha, davlat rahbari mutasaddilarga ushbu tajribadan foydalanib, loyihalarni takomillashtirish, turar joylarni aholi uchun yanada arzon qilish bo‘yicha ko‘rsatmalar bergan edi.
Shunga muvofiq, besh qavatli uylar loyihasi qayta ko‘rib chiqilib, xonadonlarning joylashuvi va xonalarning ichki maydoni maqbullashtirildi. Qurilish materiallari loyihaga mos o‘lchamda ishlab chiqariladi, isrof bo‘lmaydi. Hovli va yo‘laklarga sensorli elektr chiroqlari qo‘yiladi. Bu kabi tejamkor choralar natijasida uylarning narxi o‘rtacha 30 foizgacha arzonlashadi.
Prezident ushbu loyihani ma’qullab, bunday turar joylarni aholi zich joylashgan barcha tumanlarda qurish zarurligini ta’kidladi.
Yana bir loyiha Toshkent davlat texnika universiteti hududida zamonaviy o‘quv-amaliy kompleksi barpo etishga qaratilgan.
Rejalashtirilayotgan majmua Toshkent davlat texnika universiteti, O‘zbekiston Milliy universiteti hamda Turin politexnika universitetidagi jami 36 ming talaba, 2 mingdan ziyod professor-o‘qituvchilar uchun ilmiy markaz bo‘lishi ko‘zda tutilmoqda. Bu yerda bir paytda 500 ta startap rezidentlari, 120 ta ishlab chiqarish korxonasini joylashtirish mumkin bo‘ladi.
Toshkent shahrida aholini arzonlashtirilgan oziq-ovqat mahsulotlari bilan ta’minlash chora-tadbirlari haqida ham ma’lumot berildi.
Prezident 2020-yil 2-oktabr kuni Qoraqalpog‘istonga safar chog‘ida Nukus shahrini obodonlashtirish, aholining dam olishi uchun sharoitlarni kengaytirish bo‘yicha ko‘rsatmalar bergan edi. Shu maqsadda shaharning istiqboldagi zamonaviy markazini barpo etish bo‘yicha loyiha ishlab chiqildi. Unga muvofiq, ko‘chalarni kengaytirish va ko‘kalamzorlashtirish, ko‘llar va istirohat bog‘lari tashkil etish, savdo va maishiy xizmatlarni ko‘paytirish nazarda tutilgan.
Prezident ushbu loyihalar bilan tanishib, ularni takomillashtirish bo‘yicha qator ko‘rsatmalar berdi.
Izoh (0)