Prezident e’tirof etgan Qorako‘ldagi xalqaro matematika maktabining navbatdagi filiali Qashqadaryoda ochilishi mumkin

Prezident Shavkat Mirziyoyev e’tirofiga sazovor bo‘lgan Qorako‘ldagi xalqaro matematika maktabining bugungi kunda Sirdaryo, Navoiy va Toshkent viloyatida filiallari bor. Maktabning navbatdagi to‘rtinchi filiali Qashqadaryo viloyatida tashkil etilishi mumkin, deya xabar berdi “Daryo” muxbiri.

Ta’kidlanishicha, bunday tashabbusni Dehqonobod tuman xalq ta’limi bo‘limi mudiri Baxtiyor Yusupov xalqaro matematika maktabi direktori Temur Ro‘ziyev bilan suhbatda o‘rtaga tashlagan.

“Maktabimizning respublika miqyosida 3 ta filiali bor. Filiallarimiz Sirdaryo, Navoiy va Toshkent viloyatining Ohangaron shahrida tashkil etilgan bo‘lib, o‘quv jarayonlari endi boshlandi”, — deydi maktab direktori Temur Ro‘ziyev.

2020-yil 23-oktabr kuni xalqaro matematika maktabida bo‘lgan Dehqonobod tuman xalq ta’limi bo‘limi tasarrufidagi maktab direktorlari va faol o‘qituvchilar maktab tajribasini o‘rgangan. Dehqonobod tuman XTB mudiri Baxtiyor Yusupov esa maktab direktori va jamoasiga navbatdagi filialni Dehqonobodda tashkil etish taklifini o‘rtaga tashlagan.

Mazkur taklifga javob bergan xalqaro matematika maktabi direktori “Agar viloyat rahbari va tuman hokimi sizlarni qo‘llab-quvvatlasa va ixtisoslashtirilgan maktab internat tashkil etilsa, biz sizlar bilan ishlashga hamda navbatdagi filialni Dehqonobodda tashkil etishga tayyormiz”, degan.

Eslatib o‘tamiz, Prezident Shavkat Mirziyoyev o‘qituvchi va murabbiylar bayramiga bag‘ishlangan tabrigida “Qorako‘l maktabi biz uchun zamonaviy maktabning haqiqiy andozasi emasmi? Nima uchun Xalq ta’limi vazirligi uning noyob tajribasini yetarlicha ommalashtirmayapti? Nima uchun boshqa maktab direktorlari bu ta’lim dargohidan ibrat olmayapti? Xalq ta’limi vaziri Sherzod Shermatov nega uch yildan buyon bu jiddiy masalaga yetarlicha e’tibor bermayapti? Afsuski, hammamiz oldingdan oqqan suvning qadri yo‘q, deb, beparvo bo‘lib yuribmiz. Nima uchun boshqa viloyatlarda, deylik, Andijonda, Farg‘ona, Samarqand, Xorazm yoki Qarshida, Jizzax va Sirdaryoda bunday maktablar yo‘q?

Vaholanki, bugungi kunda bizga mana shunday yuzlab maktablar, o‘z kasbining chinakam ustasi va fidoyisi bo‘lgan minglab murabbiylar suv bilan havoday zarur. Shu munosabat bilan Xalq ta’limi vazirligi hududlar rahbarlari bilan birgalikda har bir tumanda kamida bittadan mana shunday maktab yaratish choralarini ko‘rishi zarur”, deya ta’kidlab o‘tgandi.

Prezidentning mazkur ogohlantirishidan so‘ng, Qashqadaryo viloyat xalq ta’limi boshqarmasi mas’ullari va tizim vakillari bilan muloqot qilgan Zoir Mirzayev “Maktab direktorlari Qorako‘ldagi maktabga borib, tajriba orttirsin, yangilik qilsin. Har bir tuman va shaharda matematika, kimyo, biologiya fanlariga ixtisoslashgan maktablar tashkil qilaylik. Ta’limda yangilik qiladigan vaqt keldi”, degandi.

O‘shanda Zoir Mirzayev viloyatda matematika, kimyo, biologiya fanlariga ixtisoslashgan maktab tashkil qilib, yaxshi natija ko‘rsatgan maktab direktorlariga oylik maoshidan tashqari viloyat hokimligi tomonidan har oy 5 million so‘mdan mukofot berilishini qo‘shimcha qilgandi.