Prezident farmoyishiga asosan Anvar Nosirov Markaziy Osiyo xalqaro institutiga direktor etib tayinlandi. Bu haqda Adliya vazirligi matbuot xizmati xabar berdi.
Anvar Nosirov 1972-yilda Toshkentda tug‘ilgan. 1994-yilda Toshkent davlat universitetining O‘zbekiston tarixi yo‘nalishini, 1996-yilda Jahon iqtisodiyoti va diplomatiya universitetini xalqaro huquq yo‘nalishi bo‘yicha tamomlagan.
Lavozimga tayinlangunga qadar O‘zbekiston Prezidenti administratsiyasining Ijro etuvchi apparati tashqi siyosat va iqtisodiy hamkorlikni kengaytirishni axborot-tahliliy ta’minlash sho‘basi mudiri lavozimida ishlagan.
Shuningdek, O‘zbekiston tashqi ishlar vazirining o‘rinbosari, TIVning MDH va ShHT tuzilmalari bilan hamkorlik boshqarmasi boshlig‘i, O‘zbekiston Respublikasining Shanxay hamkorlik tashkiloti ishlari bo‘yicha milliy koordinatori vazifasida ham faoliyat yuritgan.
Eslatib o‘tamiz, Markaziy Osiyo xalqaro instituti mintaqa davlatlari rahbarlari Maslahat uchrashuvining Toshkentda bo‘lib o‘tgan ikkinchi sammitida erishilgan barcha kelishuvlarni to‘liq amalga oshirish, ekspert-tahlil doira vakillari, amaliyotchi mutaxassislar o‘rtasidagi aloqalarni kengaytirish, mintaqaviy strategiyani ishlab chiqishda ular ishtirokini ta’minlash maqsadida tashkil etilgan.
Mintaqa davlatlari o‘rtasidagi o‘zaro hamkorlikni har tomonlama kengaytirishga qaratilgan strategiya va dasturlarning yangi yo‘nalishlarini ishlab chiqishga ko‘maklashish, ularni ilmiy asoslangan holda chuqur tahlil qilish va tadqiq etish yangi tashkil etilgan institutning asosiy vazifalari sifatida ko‘rsatib o‘tilgan.
Avvalroq Prezident davlat xavfsizlik xizmati raisi Bahodir Toshmatov Xavfsizlik kengashiga o‘tgani, O‘zbekiston madaniyat vaziriga yangi o‘rinbosar tayinlangani haqida xabar berilgan edi.
Izoh (0)