Президент фармойишига асосан Анвар Носиров Марказий Осиё халқаро институтига директор этиб тайинланди. Бу ҳақда Адлия вазирлиги матбуот хизмати хабар берди.
Анвар Носиров 1972 йилда Тошкентда туғилган. 1994 йилда Тошкент давлат университетининг Ўзбекистон тарихи йўналишини, 1996 йилда Жаҳон иқтисодиёти ва дипломатия университетини халқаро ҳуқуқ йўналиши бўйича тамомлаган.
Лавозимга тайинлангунга қадар Ўзбекистон Президенти администрациясининг Ижро этувчи аппарати ташқи сиёсат ва иқтисодий ҳамкорликни кенгайтиришни ахборот-таҳлилий таъминлаш шўъбаси мудири лавозимида ишлаган.
Шунингдек, Ўзбекистон ташқи ишлар вазирининг ўринбосари, ТИВнинг МДҲ ва ШҲТ тузилмалари билан ҳамкорлик бошқармаси бошлиғи, Ўзбекистон Республикасининг Шанхай ҳамкорлик ташкилоти ишлари бўйича миллий координатори вазифасида ҳам фаолият юритган.
Эслатиб ўтамиз, Марказий Осиё халқаро институти минтақа давлатлари раҳбарлари Маслаҳат учрашувининг Тошкентда бўлиб ўтган иккинчи саммитида эришилган барча келишувларни тўлиқ амалга ошириш, эксперт-таҳлил доира вакиллари, амалиётчи мутахассислар ўртасидаги алоқаларни кенгайтириш, минтақавий стратегияни ишлаб чиқишда улар иштирокини таъминлаш мақсадида ташкил этилган.
Минтақа давлатлари ўртасидаги ўзаро ҳамкорликни ҳар томонлама кенгайтиришга қаратилган стратегия ва дастурларнинг янги йўналишларини ишлаб чиқишга кўмаклашиш, уларни илмий асосланган ҳолда чуқур таҳлил қилиш ва тадқиқ этиш янги ташкил этилган институтнинг асосий вазифалари сифатида кўрсатиб ўтилган.
Аввалроқ Президент давлат хавфсизлик хизмати раиси Баҳодир Тошматов Хавфсизлик кенгашига ўтгани, Ўзбекистон маданият вазирига янги ўринбосар тайинлангани ҳақида хабар берилган эди.
Изоҳ (0)