AQSh prezidenti Donald Tramp mamlakat hududida koronavirus infeksiyasining tarqalishini to‘xtatishga qodir emas. Bu haqda AQSh sobiq prezidenti Barak Obama Florida shtatida saylovlarda demokratlar tomonidan nomzodi ilgari surilgan Jozef Baydenni qo‘llab-quvvatlash maqsadida o‘tkazilgan uchrashuvda aytib o‘tdi.
“Donald Tramp hech birimizni koronavirusdan himoya qila olmaydi. U hatto o‘z shaxsiy himoyasi uchun talab etiladigan xavfsizlik me’yorlariga amal qilmaydi. U muammo mavjudligini ham inkor etmoqda”, — degan Obama.
Obamaning so‘zlariga ko‘ra, joriy haftada prezident pandemiya tufayli o‘z ishiga tezda qaytgani haqida gapirgan. Uning fikricha, Tramp vaqtida tezkor choralar ko‘rganida hammasi hozirgidek yomon bo‘lmasdi.
Obama COVID-19 pandemiyasi har qanday prezident uchun ham og‘ir masala bo‘lishi mumkinligini qayd etgan. Sobiq prezidentning aytishicha, Oq uy ushbu sinovdan o‘ta olmagan, hukumat vakillari vaziyatga boshidan noto‘g‘ri baho bergan va tegishli choralar ko‘rmagan.
Avvalroq Obama Trampning o‘z egallab turgan lavozimiga munosib emasligi, prezidentlik muddatiga realiti-shoudagidek munosabatda bo‘lgani, siyosatchining shaxsiyatiga e’tibor kuchayib ketgani haqida gapirgandi. U ushbu harakatlar oqibatida minglab aholi koronavirusdan vafot etgani, millionlab ish o‘rinlari yo‘qotilganini ta’kidlagan.
23-oktabrda Bayden hamda Tramp o‘rtasidagi yakuniy debatlarda amaldagi prezident AQSh iqtisodiyotida lokdaun boshlanganini aytgan. Shuningdek, Tramp hukumatning millionlab odamlarning koronavirus asoratlari oqibatida halok bo‘lishining oldini olganini qayd etgan va bir necha haftadan keyin infeksiyaga qarshi vaksina tayyor bo‘lishini va’da qilgan.
Jons Hopkins universiteti umumlashtirib borayotgan statistikaga ko‘ra AQShda koronavirus infeksiyasini yuqtirib olganlar soni 8,5 milliondan oshib ketgan, 224 771 nafar bemor infeksiya asoratlari oqibatida vafot etgan. AQSh COVID-19 pandemiyasidagi vaziyat bo‘yicha dunyoda birinchi o‘rinni egallab turibdi.
Izoh (0)