АҚШ президенти Дональд Трамп мамлакат ҳудудида коронавирус инфекциясининг тарқалишини тўхтатишга қодир эмас. Бу ҳақда АҚШ собиқ президенти Барак Обама Флорида штатида сайловларда демократлар томонидан номзоди илгари сурилган Жозеф Байденни қўллаб-қувватлаш мақсадида ўтказилган учрашувда айтиб ўтди.
«Дональд Трамп ҳеч биримизни коронавирусдан ҳимоя қила олмайди. У ҳатто ўз шахсий ҳимояси учун талаб этиладиган хавфсизлик меъёрларига амал қилмайди. У муаммо мавжудлигини ҳам инкор этмоқда», — деган Обама.
Обаманинг сўзларига кўра, жорий ҳафтада президент пандемия туфайли ўз ишига тезда қайтгани ҳақида гапирган. Унинг фикрича, Трамп вақтида тезкор чоралар кўрганида ҳаммаси ҳозиргидек ёмон бўлмасди.
Обама COVID-19 пандемияси ҳар қандай президент учун ҳам оғир масала бўлиши мумкинлигини қайд этган. Собиқ президентнинг айтишича, Оқ уй ушбу синовдан ўта олмаган, ҳукумат вакиллари вазиятга бошидан нотўғри баҳо берган ва тегишли чоралар кўрмаган.
Аввалроқ Обама Трампнинг ўз эгаллаб турган лавозимига муносиб эмаслиги, президентлик муддатига реалити-шоудагидек муносабатда бўлгани, сиёсатчининг шахсиятига эътибор кучайиб кетгани ҳақида гапирганди. У ушбу ҳаракатлар оқибатида минглаб аҳоли коронавирусдан вафот этгани, миллионлаб иш ўринлари йўқотилганини таъкидлаган.
23 октябрда Байден ҳамда Трамп ўртасидаги якуний дебатларда амалдаги президент АҚШ иқтисодиётида локдаун бошланганини айтган. Шунингдек, Трамп ҳукуматнинг миллионлаб одамларнинг коронавирус асоратлари оқибатида ҳалок бўлишининг олдини олганини қайд этган ва бир неча ҳафтадан кейин инфекцияга қарши вакцина тайёр бўлишини ваъда қилган.
Жонс Ҳопкинс университети умумлаштириб бораётган статистикага кўра АҚШда коронавирус инфекциясини юқтириб олганлар сони 8,5 миллиондан ошиб кетган, 224 771 нафар бемор инфекция асоратлари оқибатида вафот этган. АҚШ COVID-19 пандемиясидаги вазият бўйича дунёда биринчи ўринни эгаллаб турибди.
Изоҳ (0)