Ayni paytda xalqaro masalalarda AQSh uchun asosiy xavfni Rossiya tug‘dirmoqda. Bunday fikrni CBS telekanaliga bergan intervyusida Demokratlar partiyasidan prezidentlikka nomzod Jo Bayden bildirib o‘tdi, deb yozadi “RBK”.
“Mening fikrimcha, ayni paytda xavfsizligimiz va ittifoqlarimizga pand yetishi nuqtayi nazaridan Amerika uchun eng katta xavf bu — Rossiya”, — dedi u jurnalistning shu haqdagi savoliga javoban.
AQShning eng yirik raqobatchisi sifatida Bayden Xitoyni tilga oldi. Uning so‘zlariga ko‘ra, mamlakatlar bundan keyin ham raqobatchi bo‘lib qolishi yoki vaziyat jiddiyroq kurashga aylanishi Vashingtonning qanday yondashishiga bog‘liq.
Baydenning fikricha, “duch kelgan diktatorni olqishlaydigan” va Vashingtonning ittifoqdoshlariga hadeb ta’na qiladigan amaldagi prezident Donald Trampning xatti-harakatlari ham AQSh uchun xavflidir. Misol sifatida u “o‘limga olib keluvchi raketalar va imkoniyatlar avvalgidan ko‘paygan” KXDRdagi hamda “yadro quroli yaratishga yaqinlashgan” Erondagi vaziyatni keltirdi.
Baydenning fikricha, Trampning siyosatini deb NATO bo‘yicha ittifoqdoshlar AQShga ishonib bo‘lmaydi, degan fikr bilan Vashingtondan yuz o‘girmoqda.
Eslatib o‘tamiz, AQShda 50 milliondan ko‘proq saylovchilar prezidentlik saylovlarida muddatidan avval ovoz berdi. AQShda prezidentlik saylovlari 2020-yilning 3-noyabr kuni bo‘lib o‘tadi.
Izoh (0)