Rossiyada 26-oktabr holatiga ko‘ra, koronavirusga chalinish bo‘yicha 17 347 ta yangi holat qayd etildi, deb xabar bermoqda Meduza virusga qarshi kurashish bo‘yicha tezkor shtab ma’lumotlariga tayanib.
Bundan avval kasallanganlar sonining sutkalik oshishi 23-oktabrda qayd etilgan, shu kuni 17 340 kishida COVID-19 aniqlangandi.
Yangi aniqlangan kasallanish holatlarining eng ko‘pi Moskva ( +5224 kishi), Sankt-Peterburgda (+715) va Moskva viloyatida (+499) qayd etilgan.
Mamlakatda kasallanganlarning umumiy soni 1 531 224 nafarga yetdi.
Sutka davomida COVID-19 bemorlarining 219 nafari, pandemiya boshlanganidan buyon esa 26 269 nafari vafot etgan. Sog‘ayganlar soni esa 1 146 096 nafarni tashkil etmoqda, shu jumladan, bemorlarning 7574 nafari so‘nggi bir-kecha kunduzda tuzalib, kasalxonadan javob berilgan.
“Rospotrebnadzor” ma’lumotlariga ko‘ra, Rossiyada koronavirusni aniqlash bo‘yicha so‘nggi 24 soat davomida 476 mingta, umumiy hisobda esa 57,8 milliondan ortiq test o‘tkazilgan.
Rossiyada jami kasallanganlar soni 1,5 milliondan oshganiga qaramay hukumat mamlakatda koronavirus tarqalishi tufayli qat’iy cheklovlarni joriy qilishni rejalashtirmayapti. “Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.
“Rospotrebnadzor” Epidemiologiya markaziy ilmiy-tadqiqot instituti direktorining tadqiqot ishlari bo‘yicha o‘rinbosari Aleksandr Gorelov Rossiyada mart oyigacha koronavirus bilan kasallanishlar soni kamayishini taxmin qilgan. Gamaleya nomidagi Milliy epidemiologiya va mikrobiologiya ilmiy-tadqiqot markazining yashirin infeksiyalar mikrobiologiyasi bo‘limining sobiq rahbari, professor, virusolog Viktor Zuyev esa mamlakatda epidemiologik vaziyat 2021-yil yozida barqarorlashadi, degan fikrda.
Izoh (0)