Qirg‘iziston prezidenti vazifasini bajarayotgan (v.b.) Sadir Japarov mamlakat rahbarligi uchun o‘tkaziladigan saylovlarda ishtirok etadi. Buning uchun u iste’foga chiqadi, deb xabar beradi Tengrinews.
Japarovning aytishicha, u mamlakat rahbari vazifasini bajaruvchi vakolatlarini dekabr oyida topshiradi.
“Men boshqalar bilan bir qatorda saylovlarga boraman. Meni saylashsa, prezident bo‘laman, aksincha bo‘lsa, yo‘q”, — deydi Sadir Japarov.
Avvalroq Qirg‘izistonda muddatidan oldingi prezidentlik saylovlari 2021-yilning 10-yanvar kuni bo‘lishi to‘g‘risida xabar berilgandi
Eslatib o‘tamiz, 15-oktabr kuni So‘ronbay Jeenbekov Qirg‘iziston prezidentligi lavozimidan iste’fo berganini e’lon qildi. U bosh vazir Sadir Japarov va boshqa siyosatchilardan o‘z tarafdorlarini poytaxtdan olib chiqib ketishni so‘ragan va ulardan bishkekliklar tinchligini buzmaslikni iltimos qilgan. 16-oktabr kuni parlament majlisida Qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.
Izoh (0)