Айни пайтда халқаро масалаларда АҚШ учун асосий хавфни Россия туғдирмоқда. Бундай фикрни CBS телеканалига берган интервьюсида Демократлар партиясидан президентликка номзод Жо Байден билдириб ўтди, деб ёзади «РБК».
«Менинг фикримча, айни пайтда хавфсизлигимиз ва иттифоқларимизга панд етиши нуқтаи назаридан Америка учун энг катта хавф бу — Россия», — деди у журналистнинг шу ҳақдаги саволига жавобан.
АҚШнинг энг йирик рақобатчиси сифатида Байден Хитойни тилга олди. Унинг сўзларига кўра, мамлакатлар бундан кейин ҳам рақобатчи бўлиб қолиши ёки вазият жиддийроқ курашга айланиши Вашингтоннинг қандай ёндашишига боғлиқ.
Байденнинг фикрича, «дуч келган диктаторни олқишлайдиган» ва Вашингтоннинг иттифоқдошларига ҳадеб таъна қиладиган амалдаги президент Дональд Трампнинг хатти-ҳаракатлари ҳам АҚШ учун хавфлидир. Мисол сифатида у «ўлимга олиб келувчи ракеталар ва имкониятлар аввалгидан кўпайган» КХДРдаги ҳамда «ядро қуроли яратишга яқинлашган» Эрондаги вазиятни келтирди.
Байденнинг фикрича, Трампнинг сиёсатини деб НАТО бўйича иттифоқдошлар АҚШга ишониб бўлмайди, деган фикр билан Вашингтондан юз ўгирмоқда.
Эслатиб ўтамиз, АҚШда 50 миллиондан кўпроқ сайловчилар президентлик сайловларида муддатидан аввал овоз берди. АҚШда президентлик сайловлари 2020 йилнинг 3 ноябрь куни бўлиб ўтади.
Изоҳ (0)