Daniya hukumati koronavirus infeksiyasi tarqalishining oldini olish maqsadida bir joyda to‘planishi mumkin bo‘lgan odamlar guruhiga qo‘yilgan 50 kishilik cheklovni 10 kishiga tushirdi, shuningdek, soat 22:00 dan alkogol mahsulotlarini sotish taqiqlandi. Bu haqda The Guardian’ga tayanib, “Interfaks” xabar berdi.
Bundan tashqari, mamlakat fuqarolariga barcha turdagi jamoat joylarida, masalan, supermarketlarda niqobda yurish majburiyati yuklandi.
Bir joyda to‘planishi mumkin bo‘lgan ishtirokchilarga qo‘yilgan cheklov kamida to‘rt hafta davomida amalda bo‘ladi, alkogol savdosiga qo‘yilgan cheklov va niqob taqish talabi 2-yanvarga qadar davom etadi.
“Biz kasalxonaga murojaat qiladigan sonining keskin ortib ketishiga tayyor turishimiz kerak”, — deydi Daniya sog‘liqni saqlash vaziri Magnus Xoynike. Ta’kidlanishicha, o‘tgan bir sutka davomida mamlakatda 859 kishida koronavirus aniqlangan.
Xoynikening so‘zlariga ko‘ra, Daniya o‘zining 5,8 million aholisi uchun koronavirusga qarshi vaksinalarni yetarlicha sotib olgan. Hukumat vaksina yaratish bilan shug‘ullanayotgan Johnson & Johnson Denmark kompaniyasi bilan bitim imzolagan.
So‘nggi ma’lumotlarga ko‘ra, Daniyada koronavirus bilan kasallanganlar soni 38,6 ming kishiga yetgan, hozirga qadar 31,2 ming bemor sog‘aygan bo‘lsa, 697 kishi COVID-19 qurboniga aylangan.
Eslatib o‘tamiz, avval Bolgariyada COVID-19 bo‘yicha vaziyat og‘irlashgani tufayli fuqarolarning ko‘chada tibbiy niqob taqqan holda yurishi majburiy etib belgilangandi. Shuningdek, Sloveniyada hukumat mamlakat miqyosida epidemiya boshlanganini e’lon qilgani, hududlar bo‘ylab harakatlanish cheklangani va tungi vaqtlarda komendantlik soati joriy etilgani haqida xabar berilgandi.
Izoh (0)