Butunukraina jamoatchilik fikrini o‘rganish chog‘ida berilgan beshta savolning barchasi bo‘yicha ijobiy javoblar olindi, deb xabar bermoqda Meduza.
Oliy Radada deputatlar sonini 450 dan 300 kishigacha qisqartirish taklifi eng ko‘p qo‘llab-quvvatlandi: so‘ralganlarning 95 foizi buni yoqlab ovoz bergan bo‘lsa, 4 foizi qarshi bo‘ldi.
O‘ta yirik miqdordagi korrupsiya uchun umrbod qamoq jazosini joriy qilishni 81 foiz odam yoqlagan bo‘lsa, 16 foizi bu taklifga qarshi chiqdi.
Ukrainaning Budapesht memorandumi bilan belgilab qo‘yilgan xavfsizlik kafolatlaridan foydalanish huquqini so‘ralganlarning 78 foizi qo‘llab-quvvatladi, yana 10 foizi norozi bo‘ldi.
Mamlakatda og‘ir bemorlarda og‘riqni kamaytirish uchun tibbiy kannabisni qonuniylashtirish taklifini so‘rov ishtirokchilarining 70 foizi qo‘lladi, yana 24 foizi qarshi chiqdi.
Donetsk va Lugansk viloyatlari hududida erkin iqtisodiy zona yaratish g‘oyasini esa ishtirokchilarning 45 foizi yoqlab ovoz berdi, 43 foizi yoqlamadi.
Ukraina prezidenti Vladimir Zelenskiy tashabbusi bilan tashkil qilingan Butunukraina ijtimoiy so‘rovi 25-oktabr kuni mamlakatdagi mahalliy saylovlar chog‘ida bo‘lib o‘tdi. Intervyu oluvchilar saylov uchastkalaridan chiqqan ukrainaliklarni so‘rovdan o‘tkazdi. Yakuniy natijalar 26-oktabr kuni e’lon qilinishi kutilmoqda.
So‘rov natijalari bevosita huquqiy kuchga ega bo‘lmaydi. Zelenskiy “beshta muhim savol” bo‘yicha umumiy so‘rov o‘tkazilishiga to‘g‘ridan to‘g‘ri demokratiya shakllaridan biri deb qarashini aytgandi.
Izoh (0)