Angliyaning Royal Tanbrij Uells shahrida yashovchi qiz Tanzaniyaga uchib ketdi va 14 farzandning onasi bo‘ldi, deb xabar beradi Daily Mail.
2013-yil 18 yoshli Letti Makmaster Afrikaga ko‘ngillilar qatorida 1 oy muddatga borgan. Keyinchalik uch yil davomida yetimxonadagi bolalarni tarbiyalash uchun qolgan. 2016-yil bolalar uyi yopilganligini tufayli Letti Iringa shahrida xususiy bolalar uyini ochgan va u yerga 9 nafar bolani ko‘chirib kelgan.
Letti ularni, shuningdek, Tanzaniya ko‘chalarida topilgan boshqa besh nafar bolani ham o‘z himoyasiga olgan. “Bu bolalar mening butun hayotim. Ularning barchasini o‘zim boqqanman, − deydi 26 yoshli ingliz qiz. – Men har doim boshpanasiz bolalarga yordam berishni xohlar edim, shuning uchun bu qarorimga oilam va do‘stlarim hayron bo‘lmadi. Ammo o‘zim bunday bo‘ladi deb o‘ylamagan edim”.
Lettining so‘zlariga ko‘ra, ko‘plab asrab olingan bolalar uni katta opa sifatida qabul qiladi. “Men ularning ba’zilaridan unchalik ham katta emasman, − deb tushuntiradi u. – Men ham o‘spirinlarni tarbiya qilayotgan onalar bilan bir xilman. Ularning mas’uliyatini bo‘ynimga olganman va shu orqali ikki oilali bo‘lish baxtiga muyassar bo‘ldim”.
Mehribonlik uylarida bolalar yomon sharoitda yashayotganlari aniqlangandan so‘ng britaniyalik qiz Tanzaniyadagi bolalar uylariga yordam berishga qaror qildi. Uning so‘zlariga ko‘ra, ko‘plab mehribonlik uylari bolalardan ishchi kuchi sifatida foydalanadi va pullarni o‘zlashtiradi.
Izoh (0)