Xitoyning Szilin provinsiyasidagi Chanbayshan tog‘ida joylashgan milliy bog‘ning Syao Yu ismli xodimi ko‘lda yashayotgan “sirli yirtqich”ni videoga olishga muvaffaq bo‘ldi. Erkak ushbu jonzotni Lox-Ness ko‘lining maxluqi deb o‘ylagan, deb xabar beradi Daily Mail.
20-oktabr kuni tongda olingan videoda qora aylanasimon obyekt suv yuzasida suzib yurganini ko‘rish mumkin. Syao Yuning so‘zlariga ko‘ra, mazkur jonzotning uzunligi 2,1 metrga yetadi.
Ta’kidlanishicha, “Samoviy ko‘lda” bunga qadar ham g‘ayrioddiy yirtqich qayd etilgan bo‘lib, uni Xitoyning Lox-Ness maxluqi deb atashgan. U haqdagi dastlabki qaydlar 1962-yilga tegishli. O‘shandan o‘nlab odamlar suvda g‘ayrioddiy jonzotni ko‘rganliklarini tasdiqlagan.
“Bunga qadar ham shu kabi vaziyatga tushganman, biroq o‘shanda bu baliqchilar qayig‘i edi. Ammo bu safar rostan ham ko‘rganimni ayta olaman. Bu aniq qayiq emasdi”, — deydi bog‘ xodimi.
Shuningdek, u bog‘ hududi tashrif buyuruvchilar uchun mutlaqo yopiqligi va u yerga kirishga qattiq taqiqlanganini qayd etgan.
Shu yilning sentabr oyi boshlarida Namanganning Kosonsoy tumanida ham “maxluq” paydo bo‘lgani to‘g‘risida xabarlar tarqalgan edi. Keyinroq tuman hokimligi holat bo‘yicha IIB tomonidan surishtiruv ishlari olib borilayotganini ma’lum qilgan.
Izoh (0)