Taniqli aktyor Jan-Klod Van Damm hujjatlari bilan muammosi borligi sabab inyeksiya orqali uxlatish yo‘li bilan o‘ldirilishi kerak bo‘lgan uch oylik chixuaxua kuchukchaning hayotini saqlab qoldi, deb yozadi The Guardian.
Raya laqabli kuchuk sentabr oyida Bolgariyadan Norvegiyadagi yangi xo‘jayinlariga olib kelingan, biroq mahalliy hukumat hayvonning soxta pasporti sabab uni ro‘yxatdan o‘tkazmagan. Skandinaviyaliklar itni o‘z vataniga qaytarishga uringan, biroq Bolgariya tomoni Yevropa Ittifoqi qoidalariga ko‘ra uni qabul qilishdan bosh tortgan. Shu sababli Norvegiya qonunlariga ko‘ra, chixuaxua 20-oktabr kuni inyeksiya orqali uxlatish yo‘li bilan o‘ldirilishi kerak bo‘lgan.
Kuchuk bilan sodir bo‘lgan voqeadan xabar topgan Van Damm vaziyatga aralashgan. U ijtimoiy tarmoqlarda hayvonning hayotini saqlab qolishga chaqirgan holda kampaniya boshlagan. Aktyor o‘zining chixuaxualari bilan tushgan videoni joylashtirib, Bolgariya hukumatidan yaqinlashib kelayotgan tug‘ilgan kuniga sovg‘a sifatida kuchukchani ortga qaytarib olishni so‘ragan.
Natijada Bolgariya chixuaxuani ortga qaytarib olishga rozi bo‘lgan. Raya mamlakatga yetib kelgach tibbiy ko‘rikdan o‘tkaziladi va shundan so‘ng uni biror kishi qaramog‘iga olishi mumkin.
Izoh (0)