Markaziy Osiyo davlatlari rahbarlarining maslahat uchrashuvi koronavirus sababli 2021-yilga qoldirildi

Markaziy Osiyo davlatlari rahbarlarining 2020-yil Bishkekda bo‘lib o‘tishi kerak bo‘lgan navbatdagi uchinchi maslahat uchrashuvi koronavirus pandemiyasi sababli 2021-yilga qoldirildi. Bu haqda O‘zbekiston tashqi ishlar vaziri Abdulaziz Komilov “Yangi O‘zbekiston” gazetasiga bergan intervyusida ma’lum qildi.

Avvalroq tashqi ishlar vaziri o‘rinbosari Ilhom Ne’matov Markaziy Osiyo davlatlari rahbarlarining avgust oyiga Bishkekda o‘tkazilishi rejalashtirilgan uchinchi maslahatlashuv uchrashuvi koronavirus pandemiyasi sabab kuzga ko‘chirilishi mumkinligini ma’lum qilgandi.

“Afsuski, koronavirus bilan bog‘liq vaziyat va pandemiyani bartaraf etish bilan bog‘liq sananing noaniqligi sabab 2020-yil oxirigacha uchinchi maslahat uchrashuvini o‘tkazish uchun imkoniyat bo‘lmasligi ko‘zga tashlanib qoldi”, — degan TIV rahbari intervyuda.

Abdulaziz Komilovning aytishicha, Turkmaniston uchinchi uchrashuvni 2021-yilda o‘tkazishni taklif qilgan. Biz maslahat kengashining hamraisi sifatida Turkmanistonning ushbu taklifini to‘liq qo‘llab-quvvatlaymiz va navbatdagi Markaziy Osiyo maslahat uchrashuvini keng va sermazmun dastur asosida o‘tkazilishiga umid qilamiz”, — deb ta’kidlagan vazir.

TIV rahbarining fikricha, Turkmanistondagi sammitdan so‘ng Qirg‘izistonning maslahat uchrashuvini Bishkekda tashkil etish bo‘yicha taklifiga yana qaytish mumkin.

“Lekin bu holat qo‘shni davlatlar rejalashtirilgan mintaqaviy hamkorlikni rivojlantirish va chuqurlashtirish yo‘lida sekinlashdi deganini anglatmaydi”, — deydi Abdulaziz Komilov. Uning aytishicha, ko‘p tomonlama hamkorlik Markaziy Osiyoning beshta davlati uchun ustuvor ahamiyatga ega.

Eslatib o‘tamiz, Markaziy Osiyo davlat rahbarlarining maslahat uchrashuvlarini muntazam o‘tkazish tashabbusi O‘zbekiston Prezidenti Shavkat Mirziyoyev tomonidan 2017-yil sentabr oyida BMT Bosh Assambleyasining 72-sessiyasida ilgari surilgan edi. Bunday birinchi yig‘ilish 2018-yil mart oyida Qozog‘iston poytaxtida, ikkinchisi esa 2019-yil noyabrda Toshkentda o‘tkazilgan va o‘shanda uchinchi uchrashuvni Bishkekda o‘tkazishga qaror qilingandi.