22-oktabr kuni ijtimoiy tarmoqlarda Namangan viloyati Uchqo‘rg‘on tumani IIB xodimlari niqobsiz erkakni mashina ichidan kuch bilan tortib olishga urinayotgani tasvirlangan video tarqaldi. Repost’ning yozishicha, viloyat IIB mazkur holat yuzasidan tushuntirish bergan.
Xabarda aytilishicha, 7-oktabr kuni Uchqo‘rg‘on tumanining Kayki ko‘chasida profilaktika inspektorlari — A.O‘rinov va S.Dehqonov tibbiy niqob taqmagan uch nafar erkak gaplashib turganini ko‘rib qolgan va ularga nisbatan ma’muriy bayonnoma tuzishga uringan. Erkaklardan biri o‘zining Nexia-2 avtomobili tomoniga yugurib, voqea joyidan qochib ketishga uringan.
Ta’kidlanishicha, inspektor A.O‘rinov avtomobilga yaqinlashib, fuqarodan tushishini so‘ragan. Erkak esa inspektorning qonuniy talabiga bo‘ysunishdan bosh tortgan. Buning o‘rniga u savol berishga tushgan: “Nega ismimni aytishim kerak, o‘zimni avtomobilimda o‘tiribman-ku?”.
Shuningdek, ma’lum qilinishicha, erkak xizmat vazifasini bajarayotgan inspektorlarni haqorat qilishga tushgan.
Holat yuzasidan ushbu fuqaroga nisbatan Ma’muriy javobgarlik to‘g‘risidagi kodeksining 40-moddasi 1-qismi (tuhmat), 54-moddasi 1-qismi (radiatsion xavfsizlikka doir qoidalar, normalar, yo‘riqnomalar va boshqa talablarni buzish) va 194-moddasi 1-qismi (ichki ishlar organlari xodimining qonuniy talablarini bajarmaslik) bilan ma’muriy bayonnoma tuzilgan va Ma’muriy ishlar bo‘yicha Uchqo‘rg‘on tuman sudiga taqdim etilgan.
Avvalroq internetda Samarqandda huquq-tartibot xodimlari 16 yoshli o‘smirni bo‘ynidan tortib patrul mashinasiga o‘tqazib, olib ketgani tasvirlangan video tarqalgan edi.
Mavzuga doir: Farg‘onada niqob taqmagan fuqarolarni kamera yordamida aniqlash boshlandi. Bir kunda 156 kishiga jarima belgilandi
Izoh (0)