Andijon viloyatining Oltinko‘l tumaniga yangi hokim tayinlandi. Tumanning yangi rahbari Iqboljon Matro‘ziyev 22-oktabr kuni bo‘lib o‘tgan xalq deputatlari tuman kengashining navbatdan tashqari sessiyasida tuman faollariga tanishtirilgan. Bu haqda “Daryo” muxbiri Umidjon Mamarasulov xabar berdi.
Iqbol Matro‘ziyev 1984-yilda Jalaquduq tumanida tug‘ilgan bo‘lib, 2008-yilda Andijon davlat universitetini tamomlagan. Ish faoliyatini 2003-yilda Jalaquduq tumanidagi 50-maktabgacha ta’lim muassasasi ishchiligidan boshlagan. Turli yillarda Jalaquduq tumani xalq ta’limi bo‘limi markazlashgan hisobxona kompyuter operatori, iqtisodchisi, moliya bo‘limi budjet inspeksiyasi boshlig‘i, moliya bo‘limi mudiri, viloyati hokimligi moliya boshqarmasi boshlig‘ining o‘rinbosari lavozimlarida ishlagan.
U Oltinko‘l tumani hokim etib tayinlanguniga qadar Andijon viloyati Bandlik bosh boshqarmasi boshlig‘i sifatida ishlab kelayotgandi.
Eslatib o‘tamiz, Oltinko‘l tumani hokimi 54 yoshli Nazirjon O‘rinboyev 7-oktabr kuni pnevmoniya kasalligi asoratlari va o‘tkir yurak qon-tomir yetishmovchiligidan vafot etgandi.
Sentabr oyi o‘rtalarida Andijon viloyatida to‘rtta hokim – Xonobod shahri va Oltinko‘l tumani hokimlaridan tashqari, Paxtaobod va Shahrixon tumanlari rahbarlari ham pnevmoniyadan davolanayotgani haqida xabar berilgandi.
Izoh (0)