Toshkent viloyati Zangiota tumanida yashovchi 1985-yilda tug‘ilgan shaxsga tuman adliya bo‘limi tomonidan tug‘ilganlik haqida guvohnoma berildi, deya xabar bermoqda “Xabar.uz”.
Ma’lum qilinishicha, 1985-yilda Zangiotadagi xonadonlarning biri ostonasiga noma’lum shaxslar chaqaloq (o‘g‘il bola) tashlab ketgan. Bolani topib olgan xonadon egalari bu haqda hech kimga, hatto bolaning o‘ziga ham bildirmaydi. Yillar davomida saqlangan sir bolaga tug‘ilganlik haqida guvohnoma olishga to‘sqinlik qiladi.
Bolaga otalik qilgan shaxs keyinroq hujjat olishga urinib ko‘radi. Ammo uning tuman xalq ta’limi bo‘limi huzuridagi vasiylik va homiylik organiga, tuman FHDYo bo‘limiga, tuman ma’muriy sudiga, fuqarolik ishlari bo‘yicha Zangiota tumanlararo sudiga qilingan murojaatlariga qaramay baribir masalaga yechim topilmaydi.
Ayni muammo O.Nurmatovni maktab ta’limini ham olish imkoniyatidan mahrum qildi. Voyaga yetgach, shar’iy nikoh asosida uylandi. Shu kunga qadar 2 nafar farzandning otasi bo‘ldi.
Yuqoridagi masalaga tuman adliya bo‘limi aralashdi.
Aniqlangan holatlar va to‘plangan hujjatlarga ko‘ra Zangiota tumani adliya bo‘limi tegishli sudga O.Nurmatovning manfaati yuzasidan ariza kiritib, uning tug‘ilganlik faktini belgilash so‘raldi.
Sud arizachi va manfaatdorlar, guvohlarning sud majlisida bergan bayonoti asosida hamda sud ekspertiza ilmiy-amaliy markazi qayta komission va kompleks ekspertizalar bo‘limi xulosasiga tayanib, arizani qanoatlantirdi.
Shu tariqa O.Nurmatovga 1985-yil 1-yanvar kuni tug‘ilganlik fakti belgilanib, unga tug‘ilganlik haqida guvohnoma berildi.
Izoh (0)