Андижон вилоятининг Олтинкўл туманига янги ҳоким тайинланди. Туманнинг янги раҳбари Иқболжон Матрўзиев 22 октябрь куни бўлиб ўтган халқ депутатлари туман кенгашининг навбатдан ташқари сессиясида туман фаолларига таништирилган. Бу ҳақда «Дарё» мухбири Умиджон Мамарасулов хабар берди.
Иқбол Матрўзиев 1984 йилда Жалақудуқ туманида туғилган бўлиб, 2008 йилда Андижон давлат университетини тамомлаган. Иш фаолиятини 2003 йилда Жалақудуқ туманидаги 50-мактабгача таълим муассасаси ишчилигидан бошлаган. Турли йилларда Жалақудуқ тумани халқ таълими бўлими марказлашган ҳисобхона компьютер оператори, иқтисодчиси, молия бўлими бюджет инспекцияси бошлиғи, молия бўлими мудири, вилояти ҳокимлиги молия бошқармаси бошлиғининг ўринбосари лавозимларида ишлаган.
У Олтинкўл тумани ҳоким этиб тайинлангунига қадар Андижон вилояти Бандлик бош бошқармаси бошлиғи сифатида ишлаб келаётганди.
Эслатиб ўтамиз, Олтинкўл тумани ҳокими 54 ёшли Назиржон Ўринбоев 7 октябрь куни пневмония касаллиги асоратлари ва ўткир юрак қон-томир етишмовчилигидан вафот этганди.
Сентябрь ойи ўрталарида Андижон вилоятида тўртта ҳоким – Хонобод шаҳри ва Олтинкўл тумани ҳокимларидан ташқари, Пахтаобод ва Шаҳрихон туманлари раҳбарлари ҳам пневмониядан даволанаётгани ҳақида хабар берилганди.
Изоҳ (0)