Sog‘liqni saqlash vazirligining Axborot-kommunikatsiya texnologiyalarini rivojlantirish markazi yagona ro‘yxatdan o‘tish va shifokor qabuliga yozilish imkoniyatini beruvchi “Elektron poliklinika” tizimi ishga tushirdi. Bu haqda vazirlik matbuot xizmati xabar berdi.
Mazkur tizim yordamida fuqarolar o‘zlari uchun qulay vaqtda, uydan chiqmagan holda shifokor qabuliga yozilishi, shifokor va muassasa haqida ma’lumotlar olishi, shuningdek, olingan tibbiy xizmatlar sifatini baholashlari mumkin bo‘ladi.
“Poliklinikalar uchun ushbu tizimning afzalliklari – ma’lumotlarni avtomatlashtirilgan ro‘yxatdan o‘tkazish, oilaviy poliklinikalarda yagona elektron ambulatoriya tibbiy kartasini yuritish imkoniyatidir”, — deyiladi xabarda.
Bugungi kunda “Elektron poliklinika” axborot tizimiga Toshkent shahri va viloyatlardagi ko‘plab oilaviy poliklinikalar ulangan bo‘lib, butun respublika hududi bo‘ylab poliklinikalarni tizimga ulash ishlari davom ettirib kelinmoqda.
Eslatib o‘tamiz, shu yilning mart oyida Toshkentdagi 100 ga yaqin tibbiy muassasada elektron tibbiy karta joriy etilishi to‘g‘risida xabar berilgandi.
Izoh (0)