Navoiy viloyatida quruvchining ustiga beton plitasi qulab tushgani haqidagi xabar berilgan edi. Qurilish vazirligi holat yuzasidan munosabat bildirib o‘tdi.
Ma’lum qilinishicha, Navoiy viloyati Karmana tumani “Dehqon” MFY hududida fuqaro Suhrob Po‘latovga tegishli uy-joydagi qayta rekonstruksiya qilib, o‘zboshimchalik bilan qurilayotgan oshxona binosidagi ishlar qurilish me’yor va qoidalariga mutlaqo zid ravishda amalga oshirilgan.
Natijada esa binodagi yuk ko‘taruvchi rigel o‘z og‘irligi, temir beton plitalar va chiqarilgan beton bloklar og‘irligini ko‘tara olmay sinib tushishi oqibatida mazkur hodisa sodir bo‘lgan.
Dastlabki o‘rganish ishlarida qurilayotgan oshxona binosining loyiha-smeta hujjatlari yo‘qligi, viloyat QSHN inspeksiyasidan ro‘yxatdan o‘tmagani, oshxona binosining yuk ko‘taruvchi konstruksiyalarining loyihasi va sarhisobi yo‘qligi, rigel ishchi armaturalari beton ustunlarga qo‘shimcha armaturalar bilan bir-biriga bog‘lanishi amaldagi me’yoriy hujjatlar talablariga zid ravishda bajarilgani aniqlangan.
Shuningdek, qurilishda ora yopma temir beton plitalar antiseysmik kamarlar bo‘ylama va ko‘ndalang devorlarning butun perimetri bo‘ylab umuman bajarilmagan. 1-qavat ora yopma temir beton plitalar ustiga, 2-qavat devorlari uchun beton bloklar (shlakoblok) og‘irligi hisobga olinmasdan juda ko‘p miqdorda olib chiqilib taxlangan.
Shu bilan birga, o‘rta o‘qdagi temir beton rigelga qo‘llanilgan quyma betonning amaldagi me’yorlar talabiga mos kelishi bo‘yicha qurilish sinov laboratoriya xulosasi olinmagan. Qurilish obyektda quyma quyilgan betonlarning 28 kunlik mustahkamlik muddatiga yetmasdan unga tashqi og‘ir yuk qo‘yilgan. Qo‘yilgan temir beton rigel ostidagi yog‘och tayanchlar beton o‘z mustahkamligiga yetmasdan olib tashlangan sabab ushbu falokat yuz bergan.
Ma’lum qilinishicha, hududdagi noqonuniy qurilish obyektlari to‘g‘risida batafsil ma’lumotlarni olish to‘g‘risida qurilish sohasida hududiy nazorat inspeksiyasi tomonidan viloyatning tuman va shahar hokimliklariga 2020-yilning 26-iyun 01-12/246-sonli yuborilgan xat javobsiz qolgan.
https://youtu.be/rKXfw0oCXWA
Mavzuga doir:
- Anhor kanali ustidagi piyodalar ko‘prigi ustunlari yemirilayotgani yuzasidan izoh berildi
- Toshkentning Farg‘ona yo‘li ko‘chasidagi ta’mirlash ishlari yakuniga yetmasdan, yo‘l chiziqlari chizib qo‘yilganiga izoh berildi
- Toshkent metropolitenining “Sergeli” yo‘nalishini qurish ishlari yakunlanayotgani ma’lum qilindi
Izoh (0)