Jizzax viloyati G‘allaorol tumanida ikki Nexia ishtirokida sodir bo‘lgan to‘qnashuv oqibatida ikki kishi halok bo‘ldi, deb xabar beradi Tergov departamenti.
Ma’lumotlarga ko‘ra, 15-oktabr kuni soat 16:00 larda 26 yoshli Sh.I. o‘z boshqaruvidagi Nexia avtomobili tumanning Chuvulloq qishlog‘i hududidan o‘tgan Dashtobod—Zomin—Baxmal 4R-40 avtomobil yo‘lida yo‘l-transport hodisasiga uchragan.
Haydovchi Baxmal—G‘allaorol yo‘nalishi bo‘yicha harakatlanib kelayotgan vaqtida o‘ziga nisbatan qarama-qarshi yo‘nalishda harakatlanayotgan 28 yoshli E.R. boshqaruvidagi Nexia rusumli avtomashina yo‘liga chiqib ketib, avariya sodir etgan.
To‘qnashuv oqibatida har ikkala avtomashina haydovchisi olingan tan jarohati sabab hodisa joyida vafot etgan.
Shuningdek, mashinalarda bo‘lgan ikki nafar yo‘lovchi turli ko‘rinishdagi tan jarohatlari olib, G‘allaorol tumani tibbiyot birlashmasining jonlantirish bo‘limiga yotqizilgan.
Mazkur holat yuzasidan G‘allaorol tumani IIB huzuridagi tergov bo‘linmasi tomonidan Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq O‘zbekistonda o‘tgan to‘qqiz oy ichida sodir bo‘lgan YTHlar oqibatida qariyb 1300 kishi halok bo‘lgani to‘g‘risida xabar berilgandi.
Mavzuga doir:
- Jizzaxda yoritish chiroqlarisiz harakatlangan Cobalt yuk mashinasiga urilishi oqibatida bir kishi halok bo‘ldi
- Jizzaxda sinfdosh qizlarni mashinada sayr qildirmoqchi bo‘lgan 9-sinf o‘quvchisi YTH sodir etdi (video)
- Jizzaxda piyodani urib ketib, voqea joyidan qochgan Isuzu haydovchisi qo‘lga olindi. Jabrlanuvchi voqea joyida vafot etgan
Izoh (0)