Навоий вилоятида қурувчининг устига бетон плитаси қулаб тушгани ҳақидаги хабар берилган эди. Қурилиш вазирлиги ҳолат юзасидан муносабат билдириб ўтди.
Маълум қилинишича, Навоий вилояти Кармана тумани «Деҳқон» МФЙ ҳудудида фуқаро Суҳроб Пўлатовга тегишли уй-жойдаги қайта реконструкция қилиб, ўзбошимчалик билан қурилаётган ошхона биносидаги ишлар қурилиш меъёр ва қоидаларига мутлақо зид равишда амалга оширилган.
Натижада эса бинодаги юк кўтарувчи ригел ўз оғирлиги, темир бетон плиталар ва чиқарилган бетон блоклар оғирлигини кўтара олмай синиб тушиши оқибатида мазкур ҳодиса содир бўлган.
Дастлабки ўрганиш ишларида қурилаётган ошхона биносининг лойиҳа-смета ҳужжатлари йўқлиги, вилоят ҚШН инспекциясидан рўйхатдан ўтмагани, ошхона биносининг юк кўтарувчи конструкцияларининг лойиҳаси ва сарҳисоби йўқлиги, ригел ишчи арматуралари бетон устунларга қўшимча арматуралар билан бир-бирига боғланиши амалдаги меъёрий ҳужжатлар талабларига зид равишда бажарилгани аниқланган.
Шунингдек, қурилишда ора ёпма темир бетон плиталар антисейсмик камарлар бўйлама ва кўндаланг деворларнинг бутун периметри бўйлаб умуман бажарилмаган. 1-қават ора ёпма темир бетон плиталар устига, 2-қават деворлари учун бетон блоклар (шлакоблок) оғирлиги ҳисобга олинмасдан жуда кўп миқдорда олиб чиқилиб тахланган.
Шу билан бирга, ўрта ўқдаги темир бетон ригелга қўлланилган қуйма бетоннинг амалдаги меъёрлар талабига мос келиши бўйича қурилиш синов лаборатория хулосаси олинмаган. Қурилиш объектда қуйма қуйилган бетонларнинг 28 кунлик мустаҳкамлик муддатига етмасдан унга ташқи оғир юк қўйилган. Қўйилган темир бетон ригел остидаги ёғоч таянчлар бетон ўз мустаҳкамлигига етмасдан олиб ташланган сабаб ушбу фалокат юз берган.
Маълум қилинишича, ҳудуддаги ноқонуний қурилиш объектлари тўғрисида батафсил маълумотларни олиш тўғрисида қурилиш соҳасида ҳудудий назорат инспекцияси томонидан вилоятнинг туман ва шаҳар ҳокимликларига 2020 йилнинг 26 июнь 01-12/246-сонли юборилган хат жавобсиз қолган.
https://youtu.be/rKXfw0oCXWA
Мавзуга доир:
Изоҳ (0)