Davlat soliq qo‘mitasi 4,5 trln so‘mdan ortiq mablag‘ni soliq to‘lovchilarga qaytarib berdi

Davlat soliq qo‘mitasi 4,5 trillion so‘mdan ortiq mablag‘ni soliq to‘lovchilarga qaytarib berdi, deya xabar qilmoqda qo‘mita matbuot xizmati.

Qayd etilishicha, 2020-yil 1-yanvardan 9-oktabrgacha davlat soliq xizmati organlariga qiymati 7,7 trillion so‘mlik 6295 ta murojaat kelib tushgan. Shundan 2773 ta hujjat ko‘rib chiqilgandan so‘ng ularning talabi qondirilgan va Moliya vazirligiga yuborilgan. Buning natijasida yil boshidan beri 4,5 trillion so‘m soliq to‘lovchilarga qaytarilgan.

Davlat soliq qo‘mitasining ta’kidlashicha, qo‘shilgan qiymat solig‘ining ortiqcha miqdorini qoplash (qaytarish)ning soddalashtirilgan tizimi soliq to‘lovchilar manfaatlariga yo‘naltirilgan.

Agar yil boshidan QQS summasini qoplash (qaytarish) faqat alohida toifaga kiruvchi soliq to‘lovchilarga qo‘llanilgan bo‘lsa, endi Vazirlar Mahkamasining “Qo‘shilgan qiymat solig‘i hamda chet el yuridik shaxslari bilan bog‘liq soliq ma’murchiligini takomillashtirish chora-tadbirlari to‘g‘risida”gi qaroriga muvofiq shartlar va tartib soddalashtirildi hamda QQS to‘lovchisi bo‘lgan barcha xo‘jalik yurituvchi subyektlarga nisbatan qo‘llanilmoqda.

U quyidagicha amalga oshiriladi:

1-qadam. Arizalar ro‘yxatdan o‘tgan joyidagi davlat soliq organlariga taqdim etiladi.

Yirik soliq to‘lovchilar yirik soliq to‘lovchilar bo‘yicha hududlararo davlat soliq inspeksiyasiga ariza yuboradi.

2-qadam. Ko‘rib chiqish jarayoni.

Bunda ariza yirik soliq to‘lovchilar, diplomatik vakolatxonalar, bank kafolati bo‘lgan shaxslar, mahsulot taqsimoti to‘g‘risidagi bitimlar ishtirokchilari va soliq monitoringi ishtirokchilari uchun tezlashtirilgan tarzda 7 kundan kechiktirmay, qo‘shilgan qiymat solig‘ining boshqa to‘lovchilari uchun esa umumiy tartibda 60 kundan kechiktirmay ko‘rib chiqiladi.

3-qadam. Qanoatlantirilgan hujjatlar Moliya vazirligiga yuboriladi.

4-qadam. Davlat budjetidan mablag‘lar soliq to‘lovchining bank hisob raqamiga o‘tkaziladi.

Avvalroq QQS to‘lovchilarga tezkor servis xizmatlari ko‘rsatish maqsadida “Maslahat markazi” tashkil etilgani haqida xabar berilgandi.