O‘zbekiston Markaziy banki so‘mning keskin qadrsizlanishi ehtimolligini past deb baholadi

2020-yilning o‘tgan to‘qqiz oyi davomida O‘zbekiston milliy valyutasining AQSh dollariga nisbatan almashuv kursi 8,6 foizga qadrsizlandi. Bu haqda Markaziy bank tomonidan taqdim etilgan ma’lumotlarda keltirilgan.

Regulyatorning ma’lumotlariga ko‘ra, aprel oyidagi to‘g‘rilanishdan so‘ng, so‘m almashuv kursi nisbatan barqaror dinamika ko‘rsatmoqda. Xususan, milliy valyuta kursi yanvar—aprel oylarida 6,6 foizga pasaygan bo‘lsa, may—sentabr oylari davomida 2 foizga pasaygan.

Ta’kidlanishicha, yil yakuniga qadar milliy valyutaning almashuv kursi dinamikasi ichki va tashqi makroiqtisodiy omillar ta’sirida, ichki valyuta bozoridagi mavjud talab va taklifning joriy nisbatidan kelib chiqib shakllanib boradi.

Qayd etilishicha, hisobot davrida ichki valyuta bozoridagi Markaziy bankning intervensiyalari oltin-valyuta zaxiralarining neytralligi tamoyiliga asoslangan holda, mahalliy ishlab chiqaruvchilardan sotib olingan oltin miqdori doirasida amalga oshirilgan.

Markaziy bank kelgusi oktabr—dekabr oylari davomida ham ushbu tamoyilga asosan ichki valyuta bozoriga intervensiyalarni amalga oshirib boradi. Bunda ichki valyuta bozorida xorijiy valyutaga bo‘lgan talabning sezilarli darajada oshishi kuzatilgan holatlarda zaruriyatga qarab, yil boshidan oltin xaridi va amalga oshirilgan intervensiya operatsiyalari o‘rtasidagi tafovutdan hosil bo‘lgan 300 million dollar miqdoridagi valyuta zaxirasi ham ushbu maqsadlarga yo‘naltirilishi mumkin.

Mazkur davrda jismoniy shaxslar tomonidan valyuta ayirboshlash shoxobchalari orqali sotilgan chet el valyutasi miqdori 3,2 milliard dollarni tashkil etib, ayni paytda ular tomonidan 2,9 milliard  dollar sotib olindi.