Yakkabog‘ tuman hokimligi tosh bostirilgan kislorod ballon suratiga izoh berdi

Qashqadaryo viloyatining Yakkabog‘ tumani hokimligi tosh bostirilgan kislorod ballon suratiga izoh berdi.

Bir necha kun ilgari Yakkabog‘ tuman hokimligining axborot xizmati hokim ishtirokidagi suratlarni ijtimoiy tarmoqdagi manziliga joyladi. Suratlar orasida kislorod ballonga tosh bostirilgani aks etgan surat ham bo‘lib, ijtimoiy tarmoqlarda “hokimlikning piar xabarida tosh bostirilgan kislorod ballonni surati ketib qoldi”, deya izohlandi.

Bunga izoh bergan hokimlik axborot xizmati hamkasblarini “qiziqqonlikda” va faqat “rasmning o‘ziga e’tibor berib, matnga ahamiyat qaratmaslik”da aybladi.

“Aslida Yakkabog‘ tuman hokimi inson hayoti uchun xavfli kislorod ballonini ko‘rib, bilib tanqid qilgan va mutasaddi rahbarlarga zudlik bilan muammoni bartaraf etish to‘g‘risida topshiriq bergan. Biz esa buni ijtimoiy tarmoqlardan yashirmadik. Aksincha vaziyatni boricha yoritdik. Yuqoridagi rasmda hamda videoda hokim tanqididan so‘ng oradan bir kun o‘tgach, bu kamchiliklar barham topganligini ko‘rishingiz mumkin bo‘ladi”, — deb yozadi hokimlik axborot xizmati.

“Kechagi holat orqaga surib bo‘lmaydigan jarayon edi. Agar men tanqiddan qo‘rqqanimda, ko‘ra bilib turib bu rasmni chiqartirmagan bo‘lar edim. Zero, inson hayoti hamma narsadan ustun turadi”, — degan tuman hokimi.

Eslatib o‘tamiz, 2020-yil 7-oktabr kuni Guliston shahridagi “Alpomish” sport majmuasida tashkil etilgan saralash va taqsimlash markazida portlash yuz bergan, Favqulodda vaziyatlar vazirligi portlash majmuadagi kislorod balloni yorilishi oqibatida sodir bo‘lganini ma’lum qilgandi. Portlash yuzasidan jinoyat ishi qo‘zg‘atilgan va hozirda tergov harakatlari olib borilmoqda.