Sirdaryo viloyati hududida yo‘l harakati xavfsizligini ta’minlash borasida olib borilgan ishlar tahlili shuni ko‘rsatdiki, 2020-yilning o‘tgan 9 oyi mobaynida haydovchilar tomonidan jami 101 ming 580 ta qoidabuzarliklar aniqlangan. Bu haqda viloyat hokimligi axborot xizmati xabar bermoqda.
Jumladan, 40 ming 355 ta qo‘pol qoidabuzarliklar, 982 ta transport vositasini mast holatda boshqarish va piyodalar ishtirokida sodir etilgan qoidabuzarliklar bo‘yicha 11 ming 790 ta holat qayd etilgan.
Qayd etilishicha, Sirdaryo viloyati yo‘l harakati xavfsizligi boshqarmasining sa’y-harakatlari bilan o‘tgan yilning xuddi shu davriga nisbatan qoidabuzarliklar kamayishiga erishilgan bo‘lsa-da, ayrim ko‘rsatkichlar hali ham yuqoriligicha qolgan.
Jumladan, viloyatda jami sodir etilgan yo‘l-transport hodisalari soni o‘tgan yilning xuddi shu davriga nisbatan 4 taga kamayib, 101 tani (3,8 foizga kam) tashkil qilgan. Og‘ir tan jarohati bilan bog‘liq yo‘l-transport hodisalar 4 taga kamayib, 62 ta (6,1 foizga kam) qayd etilgan.
2020-yilda yo‘l-transport hodisalari oqibatida vafot etgan fuqarolar sonida o‘zgarish kuzatilmagan – 39 ta o‘lim holati qayd qilingan.
Avvalroq O‘zbekistonda karantin cheklovlari yumshatilgandan so‘ng sodir etilgan YTHlar statistikasi ma’lum qilingandi.
Izoh (0)