Gulistondagi Koronavirus infeksiyasiga gumon qilingan yoki kasallangan bemorlarga tibbiy yordam ko‘rsatish, saralash va taqsimlash markaziga aylantirilgan “Alpomish” sport majmuasida 7-oktabr kuni soat 8:13 da portlash yuz berdi. FVV ma’lumotiga ko‘ra, majmuada kislorod balloni portlagan. Viloyat IIBning xabar berishicha, hodisa oqibatida vafot etganlar yo‘q, faqat bir kishi — fuqaro D.M. tan jarohati olib, kasalxonaga yotqizilgan. Ijtimoiy tarmoqlarda hodisa oqibatlari aks etgan ko‘plab foto va videoyozuvlar tarqaldi — ularda portlagan kislorod ballonlari bo‘laklari Guliston shahrining turli burchaklariga qulaganini ko‘rish mumkin. Qayd etishlaricha, majmuadagi bemorlar Respublika shoshilinch tibbiy yordam ilmiy markazi Sirdaryo viloyati filiali, viloyat ko‘p tarmoqli tibbiyot markazi, bolalar ko‘p tarmoqli tibbiyot markazi va viloyat teri-tanosil kasalliklari dispanseriga to‘liq ko‘chirilgan — evakuatsiya jarayonida kislorodga ulangan bemorlar, ijtimoiy tarmoqlarda tarqalgan suratlarda ko‘rish mumkin bo‘lganidek, kislorod ballonlari bilan birga ko‘chirilgan.

Foto: Telegram / @tentakminds