Яккабоғ туман ҳокимлиги тош бостирилган кислород баллон суратига изоҳ берди

Қашқадарё вилоятининг Яккабоғ тумани ҳокимлиги тош бостирилган кислород баллон суратига изоҳ берди.

Бир неча кун илгари Яккабоғ туман ҳокимлигининг ахборот хизмати ҳоким иштирокидаги суратларни ижтимоий тармоқдаги манзилига жойлади. Суратлар орасида кислород баллонга тош бостирилгани акс этган сурат ҳам бўлиб, ижтимоий тармоқларда «ҳокимликнинг пиар хабарида тош бостирилган кислород баллонни сурати кетиб қолди», дея изоҳланди.

Бунга изоҳ берган ҳокимлик ахборот хизмати ҳамкасбларини «қизиққонликда» ва фақат «расмнинг ўзига эътибор бериб, матнга аҳамият қаратмаслик»да айблади.

«Аслида Яккабоғ туман ҳокими инсон ҳаёти учун хавфли кислород баллонини кўриб, билиб танқид қилган ва мутасадди раҳбарларга зудлик билан муаммони бартараф этиш тўғрисида топшириқ берган. Биз эса буни ижтимоий тармоқлардан яширмадик. Аксинча вазиятни борича ёритдик. Юқоридаги расмда ҳамда видеода ҳоким танқидидан сўнг орадан бир кун ўтгач, бу камчиликлар барҳам топганлигини кўришингиз мумкин бўлади», — деб ёзади ҳокимлик ахборот хизмати.

«Кечаги ҳолат орқага суриб бўлмайдиган жараён эди. Агар мен танқиддан қўрққанимда, кўра билиб туриб бу расмни чиқартирмаган бўлар эдим. Зеро, инсон ҳаёти ҳамма нарсадан устун туради», — деган туман ҳокими.

Эслатиб ўтамиз, 2020 йил 7 октябрь куни Гулистон шаҳридаги «Алпомиш» спорт мажмуасида ташкил этилган саралаш ва тақсимлаш марказида портлаш юз берган, Фавқулодда вазиятлар вазирлиги портлаш мажмуадаги кислород баллони ёрилиши оқибатида содир бўлганини маълум қилганди. Портлаш юзасидан жиноят иши қўзғатилган ва ҳозирда тергов ҳаракатлари олиб борилмоқда.