O‘zbekiston Henley & Partners kompaniyasi tomonidan tuziladigan Henley Passport Index indeksida 2020-yilning to‘rtinchi choragida 3 pog‘ona yuqoriladi va 83-o‘rinni egalladi.
Reyting ma’lumotlariga ko‘ra, O‘zbekiston fuqarolari 57 ta davlatga vizasiz borishi yoki vizani yetib borgandan keyin olishi mumkin. O‘zbekiston 83-o‘rinni Kot d’Ivuar va Gabon bilan bo‘lishgan.
O‘zbekiston 2020-yilning iyul oyida e’lon qilingan reytingda 86-o‘rinni, yanvar oyidagi reytingda esa 85-o‘rinni egallagandi.
Reytingda birinchi o‘rinni Yaponiya egallab turibdi. Yaponiyaliklar 191 ta davlatga vizasiz borish yoki yetib borgandan keyin viza olish huquqiga ega. Singapur 190 ta mamlakat bilan ikkinchi o‘rinni egallab turibdi, uchinchi pog‘onadan esa Janubiy Koreya va Germaniya o‘rin olgan. Ularning fuqarolari 189 ta davlatga vizasiz borishi yoki yetib borgandan keyin viza olishi mumkin.
Reytingning so‘nggi qatoridan Afg‘oniston joy olgan. Mazkur davlat fuqarolari uchun 26 ta mamlakatga vizasiz kirish imkoniyati mavjud.
Izoh (0)