Jismoniy tarbiya va sport vaziriga yangi o‘rinbosar tayinlandi

Jismoniy tarbiya va sport vazirligi rahbariyatida o‘zgarish yuz berdi, deya xabar qilmoqda tashkilot matbuot xizmati.

12-oktabr kuni Jismoniy tarbiya va sport vazirligida navbatdan tashqari yig‘ilish o‘tkazildi. Unda O‘zbekiston Respublikasi Prezidentining maxsus qarori bilan Avazjon Karimov Jismoniy tarbiya va sport vazirining o‘rinbosari etib tayinlangani e’lon qilindi. Bundan keyin Karimov Jismoniy tarbiya va sport vaziri Dilmurod Nabiyevga yordam beradi.

Avazjon Karimov — 1983-yil 19-mayda Toshkent shahrida tug‘ilgan. Ma’lumoti — oliy, Toshkent davlat iqtisodiyot universiteti hamda O‘zbekiston davlat jismoniy tarbiya institutini tamomlagan.

Mehnat faoliyatini 2006-yilda O‘zbekiston karate milliy federatsiyasi raisining o‘rinbosari sifatida boshlagan. 2007—2011-yillarda O‘zbekiston karate milliy federatsiyasi Toshkent shahar bo‘limi raisi, 2011-yildan O‘zbekiston badminton federatsiyasi raisining o‘rinbosari lavozimlarida faoliyat olib borgan.

2014-2015-yillarda Sportning qishki va murakkab texnik turlari bo‘yicha Respublika oliy sport mahorati maktabi direktori o‘rinbosari, so‘ngra ot sporti bo‘yicha Respublika oliy sport mahorati maktabi direktori, O‘zbekiston Respublikasi Jismoniy tarbiya va sport Davlat qo‘mitasi Ishlar boshqarmasi boshlig‘i, 2017—2019-yillarda Chirchiq olimpiya zaxiralari maktab-internati direktori, 2019-yil 6-sentabrdan hozirga qadar Respublika olimpiya zaxiralari kolleji direktori lavozimida faoliyat yuritib kelayotgan edi.