Жисмоний тарбия ва спорт вазирига янги ўринбосар тайинланди

Жисмоний тарбия ва спорт вазирлиги раҳбариятида ўзгариш юз берди, дея хабар қилмоқда ташкилот матбуот хизмати.

12 октябрь куни Жисмоний тарбия ва спорт вазирлигида навбатдан ташқари йиғилиш ўтказилди. Унда Ўзбекистон Республикаси Президентининг махсус қарори билан Авазжон Каримов Жисмоний тарбия ва спорт вазирининг ўринбосари этиб тайинлангани эълон қилинди. Бундан кейин Каримов Жисмоний тарбия ва спорт вазири Дилмурод Набиевга ёрдам беради.

Авазжон Каримов — 1983 йил 19 майда Тошкент шаҳрида туғилган. Маълумоти — олий, Тошкент давлат иқтисодиёт университети ҳамда Ўзбекистон давлат жисмоний тарбия институтини тамомлаган.

Меҳнат фаолиятини 2006 йилда Ўзбекистон каратэ миллий федерацияси раисининг ўринбосари сифатида бошлаган. 2007—2011 йилларда Ўзбекистон каратэ миллий федерацияси Тошкент шаҳар бўлими раиси, 2011 йилдан Ўзбекистон бадминтон федерацияси раисининг ўринбосари лавозимларида фаолият олиб борган.

2014-2015 йилларда Спортнинг қишки ва мураккаб техник турлари бўйича Республика олий спорт маҳорати мактаби директори ўринбосари, сўнгра от спорти бўйича Республика олий спорт маҳорати мактаби директори, Ўзбекистон Республикаси Жисмоний тарбия ва спорт Давлат қўмитаси Ишлар бошқармаси бошлиғи, 2017—2019 йилларда Чирчиқ олимпия захиралари мактаб-интернати директори, 2019 йил 6 сентябрдан ҳозирга қадар Республика олимпия захиралари коллежи директори лавозимида фаолият юритиб келаётган эди.