Andijon viloyatining Paxtaobod tumani “Qayir” mahallasida yashovchi aholining elektr toki bilan bog‘liq muammosi hal etildi. Bu haqda “Daryo”ga viloyat hududiy elektr tarmoqlari korxonasi axborot xizmati ma’lum qildi.
2020-yilning 30-iyul kuni “Daryo”da e’lon qilingan maqolada Paxtaobod tumani “Qayir” mahallasida yashovchi fuqarolarning elektr ta’minotidagi muammolari tilga olingandi. Unda mazkur masala uch yildan buyon yechimini topmayotgani, mas’ullar aholini aldab kelayotganligi aytilgandi.
O‘shanda Paxtaobod tuman elektr tarmoqlari korxonasi bosh muhandisi Ismoil Usmonov mahallada ishlar dastur bo‘yicha uchinchi chorakda amalga oshirilishini ma’lum qilgandi.
Ikkinchi sektor kotibi Bobirmirzo Ibrohimovning aytishicha, ushbu muammoni bartaraf etish maqsadida sektor rahbari — tuman prokurori viloyat elektr tarmoqlari korxonasi bosh direktoriga xat bilan murojaat qilgan. Korxona rahbari Anvar Umaraliyev esa birinchi chorakda qilinishi belgilangan ishlar karantin sabab to‘xtab qolgani, shuningdek, zarur xomashyolarning kelishi ham to‘xtagani uchun eski holicha qolganini bildirilgandi. Aholi vakillari esa mazkur mahalla 2019-yilga davlat dasturiga kiritilganligini aytgandi.
Aytilishicha, mazkur maqoladan so‘ng “Andijon hududiy elektr tarmoqlari korxonasi” AJ rahbariyati tomonidan o‘rganish olib borilgan.
Ma’lum qilinishicha, ayni paytda Paxtaobod tuman elektr ta’minoti korxonasi xodimlari tomonidan Prezidentining 2016-yil 23-noyabrdagi “2017—2021-yillarda past kuchlanishli elektr tarmoqlarini yanada modernizatsiya qilish va yangilash dasturi to‘g‘risida”gi qarori ijrosini ta’minlash borasida qator ishlar olib borilmoqda.
“Xususan, ‘Qayir’ MFYda joylashgan TP207-250 kVA transformator yukini yengillatish maqsadida 1 dona 100/10 kVAli quvvatga ega bo‘lgan transformator punkti o‘rnatib berildi. Hozirda yangi transformator punktini o‘rnatish uchun, 40 dona temirbeton ustuni olib kelinib, montaj ishlari amalga oshirilmoqda.
Bundan tashqari 500 km 10 kVli havo tarmog‘i, 1,5 km SIP kabellarini tortish ishlari boshlab yuborilgan. Bunday sa’y-harakatlar natijasida 120 ga yaqin mahalliy aholi xonadonini sifatli elektr energiyasi bilan ta’minlashga erishiladi. Yuqoridagi ishlardan ko‘zlangan asosiy maqsad iste’molchilarni uzluksiz elektr energiyasi bilan ta’minlash, qolaversa odamlarni qiynab kelayotgan elektr energiyasi bilan bog‘liq muammolarga chek qo‘yishdir”, — deyiladi korxona axborot xizmati xabarida.
Eslatib o‘tamiz, dastlabki maqolada jurnalistlarga murojaat qilgan aholi muammosi ular OAVga murojaat qilgani uchun ham 2020-yil davomida ham, undan keyingi yillarda ham hal qilinmasligi aytilgandi.
Izoh (0)