Samarqand viloyatining Payariq tumani hokimi Dilshod Musinov tuman respublikadagi 33 ta “qoniqarsiz” hudud safidan joy olgani uchun eng birinchi navbatda o‘zi aybdor ekanligini aytib, tuman aholisidan uzr so‘radi. Bu haqda Xalq deputatlari Payariq tuman kengashining navbatdan tashqari sessiyasida ma’lum qilindi, deya xabar berdi “Daryo” muxbiri.
Sessiyada tumanda aholi jon boshiga sanoat mahsulotlari ishlab chiqarish hajmi 688,0 ming so‘mni tashkil etishi, tuman viloyatda bu masalada 13-o‘rinni egallashi aytilgan. Shuningdek, jon boshiga to‘g‘ri keladigan xizmatlar hajmi 1140,1 ming so‘mni tashkil etgan.
“Tumanda ahvoli og‘ir sektor mening sektorim hisoblanadi. Tuman ‘qoniqarsiz’ hududga kirib qolishida eng birinchi navbatda o‘zimning sektorimdagi muammolar sabab bo‘lgan deb bilaman. Buning uchun men uzr so‘rayman”, — degan tuman hokimi Dilshod Musinov.
Ma’lum qilinishicha, tumanda aholi jon boshiga to‘g‘ri keladigan chakana savdo hajmi 1929,8 ming so‘mni tashkil etib, viloyatda 15-o‘rinni egallagan.
Shuningdek, tumanda mehnat bozorining samaradorlik ko‘rsatkichlari bo‘yicha aholi bandligi 94 ming kishini, bandlik darajasi 90,8 foizni tashkil etib, viloyatda 4-o‘rinda bormoqda. Bu borada yangi ish o‘rinlarini yaratish va aholi bandlik darajasini 30 foizga oshirish belgilangan. Xususan, tumanning Ingichka qishlog‘ida 1600 gektar lalmi maydonda intensiv uzumzor barpo etish orqali 3200 ta ish o‘rni yaratish borasida ishlar olib borilmoqda. Tuman aholisi orasida tashabbuskorlarni aniqlab, 50 sotixdan kredit asosida tayyor bog‘ ajratilishi ta’minlanadi. 3200 nafar yoshlarning bandligi ta’minlanib, bozorlarda oziq-ovqat mahsulotlari ko‘payishiga imkon yaratiladi.
Tuman hokimining ma’lum qilishicha, xotin-qizlarning ish bilan bandlik darajasi 85,8 foizni ko‘rsatib, tuman viloyatda 6-o‘rinda bormoqda. Qolaversa, 1236 nafar ishsiz xotin-qizning bandligini ta’minlash choralari ishlab chiqilib, 98 nafarini ijtimoiy-iqtisodiy rivojlantirish dasturlarida ishga tushayotgan korxonalarda yaratilayotgan ish o‘rinlariga joylashtirilishi belgilangan.
Payariq tumanining eksportga yo‘naltirilgan sanoat mahsulotlari hajmi 7,1 mlrd. so‘mni tashkil etib, viloyatda 13-o‘rinni egallagan. Tumanda faoliyat yuritayotgan “Samarqand cotton cluster” MChJ tomonidan yil yakuniga qadar 2,0 mln dollar sanoat mahsulotlari eksportini amalga oshirish ishlari olib borilmoqda.
Mavzuga doir:
- Shofirkon hokimi tuman “qoniqarsiz” baholangani uchun xalqdan uzr so‘radi. Bu paytda esa ayrim mas’ullar uxlayotgandi
- Nishon tumani hokimi: “Biz belgilangan ishlarni vijdonan bajarganmiz, ammo raqamlar statistikada qanday aks etayotgani bilan qiziqmaganmiz”
- Jondor tumani hokimi: Tumanimiz “qoniqarsiz” deb topilishiga asosiy sabab — e’tiborsizligimiz
- Kasbi hokimi To‘xtamurod Meyliyev tuman aholisidan uzr so‘radi
Izoh (0)