Андижон вилоятининг Пахтаобод тумани «Қайир» маҳалласида яшовчи аҳолининг электр токи билан боғлиқ муаммоси ҳал этилди. Бу ҳақда «Дарё»га вилоят ҳудудий электр тармоқлари корхонаси ахборот хизмати маълум қилди.
2020 йилнинг 30 июль куни «Дарё»да эълон қилинган мақолада Пахтаобод тумани «Қайир» маҳалласида яшовчи фуқароларнинг электр таъминотидаги муаммолари тилга олинганди. Унда мазкур масала уч йилдан буён ечимини топмаётгани, масъуллар аҳолини алдаб келаётганлиги айтилганди.
Ўшанда Пахтаобод туман электр тармоқлари корхонаси бош муҳандиси Исмоил Усмонов маҳаллада ишлар дастур бўйича учинчи чоракда амалга оширилишини маълум қилганди.
Иккинчи сектор котиби Бобирмирзо Иброҳимовнинг айтишича, ушбу муаммони бартараф этиш мақсадида сектор раҳбари — туман прокурори вилоят электр тармоқлари корхонаси бош директорига хат билан мурожаат қилган. Корхона раҳбари Анвар Умаралиев эса биринчи чоракда қилиниши белгиланган ишлар карантин сабаб тўхтаб қолгани, шунингдек, зарур хом ашёларнинг келиши ҳам тўхтагани учун эски ҳолича қолганини билдирилганди. Аҳоли вакиллари эса мазкур маҳалла 2019 йилга давлат дастурига киритилганлигини айтганди.
Айтилишича, мазкур мақоладан сўнг «Андижон ҳудудий электр тармоқлари корхонаси» АЖ раҳбарияти томонидан ўрганиш олиб борилган.
Маълум қилинишича, айни пайтда Пахтаобод туман электр таъминоти корхонаси ходимлари томонидан Президентининг 2016 йил 23 ноябрдаги «2017—2021 йилларда паст кучланишли электр тармоқларини янада модернизация қилиш ва янгилаш дастури тўғрисида»ги қарори ижросини таъминлаш борасида қатор ишлар олиб борилмоқда.
«Хусусан, ‘Қайир’ МФЙда жойлашган ТП207-250 кВА трансформатор юкини енгиллатиш мақсадида 1 дона 100/10 кВАли қувватга эга бўлган трансформатор пункти ўрнатиб берилди. Ҳозирда янги трансформатор пунктини ўрнатиш учун, 40 дона темирбетон устуни олиб келиниб, монтаж ишлари амалга оширилмоқда.
Бундан ташқари 500 км 10 кВли ҳаво тармоғи, 1,5 км SIP кабелларини тортиш ишлари бошлаб юборилган. Бундай саъй-ҳаракатлар натижасида 120 га яқин маҳаллий аҳоли хонадонини сифатли электр энергияси билан таъминлашга эришилади. Юқоридаги ишлардан кўзланган асосий мақсад истеъмолчиларни узлуксиз электр энергияси билан таъминлаш, қолаверса одамларни қийнаб келаётган электр энергияси билан боғлиқ муаммоларга чек қўйишдир», — дейилади корхона ахборот хизмати хабарида.
Эслатиб ўтамиз, дастлабки мақолада журналистларга мурожаат қилган аҳоли муаммоси улар ОАВга мурожаат қилгани учун ҳам 2020 йил давомида ҳам, ундан кейинги йилларда ҳам ҳал қилинмаслиги айтилганди.
Изоҳ (0)