“Qashqadaryoda ahvol bu darajaga yetganidan xabarim yo‘q ekan”. Alisher Sa’dullayev “Daryo”dagi maqolaga munosabat bildirdi

Yoshlar ishlari agentligining Qashqadaryo viloyatidagi Chiroqchi va Dehqonobod tumani bo‘limlarida agentlik suhbatidan o‘tgan mutaxassislar ish boshlaydi. Bu haqda agentlik direktori Alisher Sa’dullayev bilan suhbatlashgan “Daryo” muxbiri xabar berdi.

“Daryo” internet nashrida “Qashqadaryodagi ayrim tumanlarda Yoshlar ishlari bo‘limlariga agentlik tavsiya qilgan nomzodlar emas, boshqalar tayinlandi. Chunki agentlikning xati ‘yuridik kuchga ega emas’” sarlavhali maqola e’lon qilingach, agentlikning Qashqadaryodagi mas’ullari respublika tashkiloti suhbatidan o‘tgan rahbarlikka nomzodlarni “tajribasiz, rejasiz, yoshlarning muammolaridan bexabar” deb atadi.

Shundan so‘ng “Daryo” nashri “Yoshlar ishlari agentligi mas’ullari o‘tkazgan suhbatlardan ‘tajribasiz, muammolardan bexabar, ish rejasi yo‘q, ish haqidan bexabar’ mutaxassislar o‘tib ketganiga, viloyat tashkiloti rasmiy ishlarni oddiy telefon suhbati orqali (shunda ham yuqori turuvchi tashkilotning xatidan salkam bir oy o‘tib) hal qilayotganiga agentlik va uning rahbari Alisher Sa’dullayev qanday munosabat bildiradi? Tashkilotning oddiy tayinlov ishlarida shuncha tartibsizlik va tushunmovchilik, yoshlarning katta ishlari, katta muammolari qanday hal qilinadi?”, degan savolni o‘rtaga tashladi.

“Daryo”ning Qashqadaryo viloyati muxbiri Otabek Qo‘ldoshev bilan telefon orqali muloqot qilgan Alisher Sa’dullayev holatga munosabat bildirdi.

“Men Qashqadaryodagi ahvol bu darajaga yetganidan xabarim yo‘q ekan. Yo‘l qo‘yilgan xato-kamchilik bartaraf etiladi. Boshqarmamiz xodimlari yo‘l qo‘ygan xato-kamchiliklarni ko‘rsatib berganingiz uchun sizga va “Daryo” jamoasiga minnatdorlik bildiraman”, — dedi Alisher Sa’dullayev.

Agentlik direktori agar Dehqonobod hamda Chiroqchi tumanidan nomzod qilib ko‘rsatilgan va agentlik suhbatidan o‘tgan mas’ullarning o‘zi istasa agentlik ularga ishonch bildirishini ma’lum qildi.

“Dehqonobod tumanidan nomzod sifatida ko‘rsatilgan Adham Qulmamatov hamda Chiroqchidan nomzod qilib ko‘rsatilgan Alisher Beknazarovlarning o‘zi ishlashni xohlasa, biz ularga imkoniyat beramiz va ular bilan ishlaymiz”, — dedi Alisher Sa’dullayev.

Alisher Sa’dullayev bu haqda agentlikning rasmiy Telegram kanalida munosabat ham bildirilishini ma‘lum qildi.