“Napoli” Turinda o‘tishi kerak bo‘lgan “Yuventus”ga qarshi o‘yinga yetib kelolmadi. Mezbonlar asosiy tarkibni e’lon qilib, 45 daqiqa kutdi

Italiya A Seriya doirasidagi “Yuventus” — “Napoli” uchrashuvi belgilangan vaqtda bo‘lib o‘tmadi.

“Napoli” jamoaning ayrim futbolchilarida koronavirus aniqlangani bois Turinga yetib kela olmadi. Neapol sog‘liqni saqlash tashkiloti “Napoli”ga Turinga uchishni taqiqlagan.

Biroq A Seriya rahbariyati o‘yinni qoldirishga hech qanday asos yo‘qligi bildirgan.

“Yuventus” Toshkent vaqti bilan 4-oktabr, 23:45 da boshlanishi belgilangan uchrashuv uchun uchun “Alyans Stadium”ga yetib kelgan va tarkibni e’lon qilgan.

Uchrashuv bosh hakami reglamentga ko‘ra raqib jamoani o‘yin boshlanishi belgilangan vaqtdan keyin 45 daqiqa davomida kutgan, shundan keyin bahs bekor qilingan.

Xabarlarga ko‘ra, “Napoli”ga 0:3 hisobidagi texnik mag‘lubiyat yoziladi. Klub mazkur qaror yuzasidan sudga shikoyat qilishi mumkin.

Eslatib o‘tamiz, 27-sentabr kuni neapolliklar “Jenoa”ga qarshi o‘yin o‘tkazdi (6:0), shundan keyin Eldor Shomurodovning yangi jamoasida koronavirus bilan bog‘liq 14 ta holat kuzatildi. Biroz o‘tib “Napoli” futbolchilari Petr Zelinski va Elif Elmasda infeksiya borligi aniqlandi.