O‘zbekistonlik hujumchi Eldor Shomurodov “Rostov”dan “Jenoa” safiga o‘tdi. Italiya klubi Shomurodov bilan 2024-yilga qadar mo‘ljallangan shartnoma imzoladi.
“Sport-Ekspress”ning xabar qilishicha, “Rostov” transferdan 7,5 million yevro ishlab olgan, shuningdek, Shomurodov ma’lum miqdorda gol urgan taqdirda yana 1,5 million bonus pullari nazarda tutilgan.
Xabarda aytilishicha, uning “Jenoa”dagi maoshi yiliga 1 million yevroni tashkil qiladi.
Ma’lumot uchun, 25 yoshli futbolchi “Mash’al” akademiyasi tarbiyalanuvchisi hisoblanib, “Bunyodkor” va “Rostov” safida harakat qilgan. Eldor rostovliklar jamoasida 2017-yildan beri to‘p tepib kelardi. Mazkur vaqt mobaynida u 91 o‘yinda maydonga tushib, 18 ta gol urdi va 12 ta golli uzatma amalga oshirdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)