Namangan shahridagi Namangan City loyihasi bekor qilingan mahallada keng ko‘lamda obodonlashtirish ishlari boshlandi. Bu haqda “Daryo” muxbiri Azizbek Abduvaliyev xabar bermoqda.
Viloyat hokimi Shavkatjon Abdurazzoqovning Namangan shahridagi “Guliston” mahallasi aholisi bilan uchrashuvida mazkur hududda qad rostlashi rejalashtirilgan Namangan City loyihasi bekor qilinishi, lekin bu sharoiti nochor hududning qiyofasi butkul o‘zgarishini ma’lum qilgandi.
Kecha erta tongdan boshlab mazkur mahallada keng ko‘lamli obodonlashtirish ishlari boshlab yuborildi. Buning uchun o‘nlab maxsus texnika, yuzga yaqin ishchi-xodim safarbar qilindi.
Mahalladagi abgor holatga kelgan yo‘llar asfalt yotqizish uchun tayyorlanmoqda. Beton lotoklar o‘rnatilishi, elektr tayanch ustunlari va suv quvurlari yangilanishi rejalashtirilmoqda.
Viloyat elektr, gaz, “Suvoqova”, obodonlashtirish korxonalari xodimlari o‘zlariga topshirilgan yumushlarni bajarishga kirishdi. Viloyat qurilish bosh boshqarmasi mutasaddilari esa bu ishlar vaqtida va sifatli bajarilishini nazorat qilmoqda.
Mahallada boshlangan xayrli ishlardan gulistonliklar ham chetda qolayotgani yo‘q. Ular ko‘chalarni tozalash, yon-atrofni ko‘rkam holga keltirishda ommaviy ishtirok etmoqda.
Izoh (0)