Наманган шаҳридаги Namangan City лойиҳаси бекор қилинган маҳаллада кенг кўламда ободонлаштириш ишлари бошланди. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокими Шавкатжон Абдураззоқовнинг Наманган шаҳридаги «Гулистон» маҳалласи аҳолиси билан учрашувида мазкур ҳудудда қад ростлаши режалаштирилган Namangan City лойиҳаси бекор қилиниши, лекин бу шароити ночор ҳудуднинг қиёфаси буткул ўзгаришини маълум қилганди.
Кеча эрта тонгдан бошлаб мазкур маҳаллада кенг кўламли ободонлаштириш ишлари бошлаб юборилди. Бунинг учун ўнлаб махсус техника, юзга яқин ишчи-ходим сафарбар қилинди.
Маҳалладаги абгор ҳолатга келган йўллар асфальт ётқизиш учун тайёрланмоқда. Бетон лотоклар ўрнатилиши, электр таянч устунлари ва сув қувурлари янгиланиши режалаштирилмоқда.
Вилоят электр, газ, «Сувоқова», ободонлаштириш корхоналари ходимлари ўзларига топширилган юмушларни бажаришга киришди. Вилоят қурилиш бош бошқармаси мутасаддилари эса бу ишлар вақтида ва сифатли бажарилишини назорат қилмоқда.
Маҳаллада бошланган хайрли ишлардан гулистонликлар ҳам четда қолаётгани йўқ. Улар кўчаларни тозалаш, ён-атрофни кўркам ҳолга келтиришда оммавий иштирок этмоқда.
Изоҳ (0)