Moskvada COVID-19 bemorlari soni ortgani tufayli maktablardagi ta’til vaqti uzaytirildi

Moskva maktablarida 5-oktabrdan 18-oktabrgacha ikki haftalik ta’til e‘lon qilindi, deb xabar bermoqda Meduza shahar meri Sergey Sobyanin blogidagi ma’lumotga tayanib. Odatda maktablarda kuzgi ta’til bir hafta davom etadi, ammo koronavirus tarqalishi bilan bog‘liq vaziyat tufayli ta’til muddati uzaytirilgan.

“Sanitariya shifokorlarining tavsiyasiga ko‘ra, kasallik tarqalishi darajasining pasayishi va COVID-19 aniqlangan bemorlar sonining ko‘payishini hisobga olib, men kuzgi ta’til davomiyligini oshirishga qaror qildim”, — deb yozgan Sergey Sobyanin.

Qayd etilishicha, ta’til davomida masofaviy darslar bo‘lmaydi, ammo maktab o‘quvchilari o‘tgan darslarni takrorlashi va xohishga ko‘ra, Moskva elektron maktabi yordamida yangi materiallarni o‘rganishi mumkin.

Qo‘shimcha ta’lim va bolalarning bo‘sh vaqtlarini unumli o‘tkazish muassasalari ham o‘z foliyatini ikki haftagacha to‘xtatib turadi, ammo bolalar bog‘chalari “odatdagi jadval bo‘yicha” ishlashda davom etadi.

Tezkor shtabning 28-sentabrdagi ma’lumotlariga ko‘ra, Moskvada so‘nggi sutkada koronavirusga chalinish bo‘yicha yana 2117 ta yangi holat qayd etildi. Taqqoslash uchun, bir kun avval 2016 ta yangi holat, bir hafta avval , 21-sentabr kuni esa Moskvada kunlik o‘sish holati 915 tani tashkil etgan.

O‘zbekistondagi maktablarda esa o‘quv yili 14-sentabrdan boshlangan, Xalq ta’limi vazirligi hozircha maktabdagi ta’til kunlariga o‘zgartirish kiritish rejalashtirmaganini ma’lum qilgandi.