Москва мактабларида 5 октябрдан 18 октябргача икки ҳафталик таътил эълон қилинди, деб хабар бермоқда Meduza шаҳар мери Сергей Собянин блогидаги маълумотга таяниб. Одатда мактабларда кузги таътил бир ҳафта давом этади, аммо коронавирус тарқалиши билан боғлиқ вазият туфайли таътил муддати узайтирилган.
«Санитария шифокорларининг тавсиясига кўра, касаллик тарқалиши даражасининг пасайиши ва COVID-19 аниқланган беморлар сонининг кўпайишини ҳисобга олиб, мен кузги таътил давомийлигини оширишга қарор қилдим», — деб ёзган Сергей Собянин.
Қайд этилишича, таътил давомида масофавий дарслар бўлмайди, аммо мактаб ўқувчилари ўтган дарсларни такрорлаши ва хоҳишга кўра, Москва электрон мактаби ёрдамида янги материалларни ўрганиши мумкин.
Қўшимча таълим ва болаларнинг бўш вақтларини унумли ўтказиш муассасалари ҳам ўз фолиятини икки ҳафтагача тўхтатиб туради, аммо болалар боғчалари «одатдаги жадвал бўйича» ишлашда давом этади.
Тезкор штабнинг 28 сентябрдаги маълумотларига кўра, Москвада сўнгги суткада коронавирусга чалиниш бўйича яна 2117 та янги ҳолат қайд этилди. Таққослаш учун, бир кун аввал 2016 та янги ҳолат, бир ҳафта аввал , 21 сентябрь куни эса Москвада кунлик ўсиш ҳолати 915 тани ташкил этган.
Ўзбекистондаги мактабларда эса ўқув йили 14 сентябрдан бошланган, Халқ таълими вазирлиги ҳозирча мактабдаги таътил кунларига ўзгартириш киритиш режалаштирмаганини маълум қилганди.
Мавзуга доир:
- Москвада июнь охиридан бери биринчи бор коронавирус билан суткалик касалланиш ҳолати минг кишидан ошди
- Москва ҳукумати кексаларни уйда қолишга, иш берувчиларни эса ходимларини масофадан ишлашга ўтказишга чақирди
- Москвада COVID-19 сабаб уйларни иситиш мавсуми муддатидан аввалроқ бошланиши эълон қилинди
Изоҳ (0)