O‘zbekiston bosh vaziri Abdulla Aripov Savdo-iqtisodiy hamkorlik bo‘yicha Hukumatlararo komissiyaning 7-yig‘ilishida ishtirok etish uchun 29-sentabr kuni Tojikiston poytaxtiga jo‘nab ketgani to‘g‘risida xabar bergan edik.
“Daryo” muxbirining xabar berishicha, har ikki davlatning hukumat rahbarlari o‘rtasida bo‘lib o‘tgan uchrashuv davomida Abdulla Aripov iqtisodiy, ijtimoiy va madaniy aloqalar borasida so‘z yuritdi.
“Bizdagi statistikaga ko‘ra, so‘nggi uch yilda har ikki davlat o‘rtasidagi savdo aloqalari 2,5 barobarga yuqoriladi. O‘zbekistonning Tojikistonga eksporti 2,1 barobarga oshgan bo‘lsa, Tojikiston eksporti qariyb 5 barobar ortdi. Bundan kelib chiqadiki, bizning munosabatlarimiz faqat bir tomonlama manfaatli hamkorlik emas, balki har ikki tomonga naf keltiradi.
2020-yilda pandemiya tufayli O‘zbekiston va Markaziy Osiyodagi boshqa davlatlar o‘rtasida o‘zaro tovar ayirboshlash pasaydi, ammo faqat Tojikiston bilan o‘tgan yilning mos davriga nisbatan 4,3 foizga oshib, 317 million dollarni tashkil etdi.
Yaqin yillarda oldimizga qo‘yilgan vazifa — o‘zaro tovar aylanmasini 1 milliard AQSh dollariga yetkazish imkoniyatiga egamiz.
Fursatdan foydalanib, 2020-yilda suv tanqis bo‘lishiga qaramasdan, qo‘shimcha suv yetkazib berganingiz uchun Tojikiston tomoniga alohida minnatdorlik bildiramiz.
Mamlakatlarimiz o‘rtasida turli sohalarda, xususan, ilmiy markazlar o‘rtasida tajriba almashish muhim ahamiyatga ega. Shu munosabat bilan, navbatdagi ishchi guruh yig‘ilishini Toshkentda o‘tkazishni taklif qilamiz.
Pandemiya vaqtida bir birimizni qo‘llab-quvvatlaganimiz hamkorlikning qay darajada mustahkam ekanini bildiradi. O‘zbekiston bu hamkorlikni davom ettirishga tayyor”, — dedi Abdulla Aripov.
O‘z navbatida Tojikiston Bosh vaziri Qohir Rasulzoda ham tashrif uchun O‘zbekiston hukumati rahbariga minnatdorchilik bildirdi.
“O‘zbekiston va Tojikiston o‘rtasida yechimini topmagan masala qolmadi. Hurmatli Abdulla Nig‘matovich, ushbu majlis tashkil etilgani va undagi ishtirokingiz uchun sizga minnatdorchilik bildiraman.
Majlis davomida qabul qilingan qarorlar ikki tomonlama bajarilishiga ishonaman”, — dedi Qohir Rasulzoda.
Izoh (0)