28-sentabrdan boshlab Rossiya poytaxti Moskva shahrida uylarni isitish mavsumi boshlanadi. Bu haqda shahar meri Sergey Sobyanin o‘z blogida ma’lum qildi.

Foto: Global Look Press

“Men isitish mavsumini muddatidan avval boshlash yuzasidan qaror qabul qildim. Dushanbadan boshlab aholi turar joylariga issiqlik ta’minoti beriladi”, — degan Sobyanin.

Shuningdek, u yangi hafta boshidan Moskvadagi keksa yoshli, surunkali kasalliklar bilan og‘rigan kishilarga koronavirus infeksiyasi bilan kasallanish holatlari ko‘paygani sababli uydan ko‘chaga chiqmaslikni tavsiya qilgandi.

Merning so‘zlariga ko‘ra o‘z o‘zini yakkalash tartibiga o‘tgan qariyb ikki million aholiga qulaylik yaratish maqsadida xonadonlarni issiqlik ta’minoti bilan ta’minlash ishlar muddatidan avval bajarilgan. Sobyanin ayrim nafaqaxo‘rlarning dala-hovlilarda ekani va u yerda shaxsni yakkalash tartibiga amal qilayotganini ham eslatgan.

“Dala-hovlilarga ham issiqlik berish kerak, shuning uchun dala-hovli va bog‘ uchastkalariga imtiyozli narxlarda o‘tin yetkazib berish bo‘yicha dasturni ishga tushirdik”, — degan mer.

Sobyanin 17-sentabrda sutkasiga o‘rtacha 8 darajani me’yoriy ko‘rsatkich deb hisoblanishini kutib o‘tirmay, uylarga issiqlik berishni ertaroq boshlash haqida gapirgandi. O‘shanda u moskvaliklarning ortiqcha kasalliklarga chalinishiga yo‘l qo‘ymaslik zarurligini qayd etgan.

24-sentabrda Moskvada iyun oxiridan beri birinchi bor koronavirus bilan sutkalik kasallanish holati ming kishidan oshgandi.

21-sentabrda Moskva viloyati gubernatori Andrey Vorobyev kunduz kuni havo harorati ancha iliq bo‘lishiga qaramay aholi turar joylarida issiqlik ta’minoti yoqilishiga ruxsat bergandi.