Buyuk Britaniya va Kanada Belarusda prezident saylovining soxtalashtirilgani va inson huquqlarining buzilgani sababli Aleksandr Lukashenko va uning odamlariga qarshi sanksiya joriy qildi. Bu haqda Meduza xabar berdi.
Buyuk Britaniya hukumatining ma’lum qilishicha, Aleksandr Lukashenko rejimi saylov soxtalashtirilganidan keyin muxolifat vakillari, OAV va Belarus xalqiga nisbatan sodir etilgan inson huquqlari buzilishi uchun javobgar hisoblanadi. “Xalqaro hamjamiyatning ko‘p sonli chaqiruvlariga qaramasdan, Lukashenko muxolifat bilan muloqot olib borishdan bosh tortdi va buning o‘rniga o‘zining shafqatsiz zo‘ravonligini ikki baravar oshirishga qaror qildi”, — deyiladi bayonotda.
Buyuk Britaniya tomonidan joriy qilingan sanksiyalar o‘z ichiga mamlakatga kirishga taqiq va aktivlarni muzlatishni oladi. Aleksandr Lukashenkodan tashqari, sanksiyalar ostiga uning katta o‘g‘li Viktor, Belarus prezidenti administratsiyasi rahbari Igor Sergeyenko, ichki ishlar vaziri Yuriy Karayev, uning o‘rinbosarlari Aleksandr Barsukov va Yuriy Nazarenko, Ichki ishlar vazirligi ichki qo‘shinlari qo‘mondoni o‘rinbosari Kazalbek Atabekov va Minsk militsiyasining maxsus topshiriqlar bo‘linmasi boshlig‘i Dmitriy Balaba tushgan.
Bunga o‘xshash taqiq Kanada tomonidan ham joriy qilindi. Cheklovlar qatoriga mamlakatga kirishga, sanksiyalar ostidagi shaxslar bilan shartnomalar tuzishga taqiqlar kirgan. Ro‘yxatga Buyuk Britaniya hukumati tomonidan sanksiya ostiga qo‘yilganlardan tashqari Minsk politsiyasi rahbari Ivan Kurbakov, Belarus Markaziy saylov komissiyasi raisi Lidiya Yermoshina va uning ikki nafar xodimi Yelena Dmuxaylo va Vadim Ipatov kiritilgan.
Avgust oyining oxirida Latviya, Litva va Estoniya Aleksandr Lukashenko va yana 29 nafar belaruslik mansabdorning o‘z hududlariga kirishini taqiqlagandi, 25-sentabr kuni esa bu ro‘yxat kengaytirildi.
Belarus Tashqi ishlar vazirligi 29-sentabr kuni Boltiq mamlakatlarining har biriga nisbatan javob choralarini joriy qilinishini bildirdi, biroq aynan qanday choralar ko‘rilishiga aniqlik kiritmadi.
Yevropa Ittifoqi avgust oyidan buyon belaruslik mansabdorlarga qarshi sanksiyalar tayyorlashni boshlagan, biroq Turkiyaga qarshi yangi sanksiyalar qo‘llayotgan Kiprning pozitsiyasi sababli Belarusga qarshi sanksiyalarni kelishishning imkoni bo‘lmayapti.
Eslatib o‘tamiz, 23-sentabr kuni Aleksandr Lukashenko yashirincha inauguratsiya marosimini o‘tkazgan va rasman Belarus prezidenti lavozimida ish boshlagan. Bu esa mamlakatda noroziliklarning yangi to‘lqini yuzaga keltirdi.
Shundan so‘ng Litva, Latviya, Estoniya, Slovakiya, Ukraina, Germaniya, Kanada, Polsha, AQSh, Shvetsiya, Norvegiya, Buyuk Britaniya va Yevropa Ittifoqi Lukashenkoni Belarusning qonuniy prezidenti sifatida tan olishdan bosh tortdi.
Belarus muxolifati yetakchisi Svetlana Tixanovskaya Aleksandr Lukashenkoning Belarus prezidentligi lavozimiga yashirin inauguratsiyasiga bag‘ishlangan videomurojaat yo‘llab, unda o‘zini belarus xalqining yagona yetakchisi deb atadi.
Svetlana Tixanovskaya Fransiya prezidenti Emmanuel Makronga Aleksandr Lukashenko rejimi bilan muloqotda vositachi bo‘lishni so‘rab murojaat qildi va u bilan Litvada uchrashdi.
Izoh (0)